Sambhaji Raje Chhatrapati On Maratha Reservation:

''सरसकट मराठा समाजाला प्रमाणपत्र देणं कायदेशीरदृष्ट्या बसत असेल, तर सरकारने ते द्यावे. पण हे शक्य नसेल तर सरकारने तसं स्पष्ट सांगावं. खेळ करू नये'', असं संभाजीराजे छत्रपती म्हणाले आहेत. मराठा आरक्षणाच्या पार्श्वभूमीवर सह्याद्री अतिथी गृह येथे मुख्यमंत्र्यांच्या अध्यक्षतेखाली सर्वपक्षीय बैठक बोलवण्यात आली आहे. याच बैठकीत आपलं मत मांडल्यानंतर माध्यमांशी बोलताना संभाजीराजे असं म्हणाले आहेत.

ते म्हणाले की, ''सर्वपक्षीय बैठकीला मला आमंत्रित बोलवलं होतं. माझा मुद्दा मांडून मी निघालो आहे. छत्रपती शाहू महाराजांनी पहिलं आरक्षण दिलं होतं. 15-20 वर्षापासून मी गरीब मराठ्यांना आरक्षण देण्यासाठी मागणी करत आहे. जरांगे पाटील यांना सरकार दरवेळी आश्वासन देतं, पुढे काही होत नाही. लाठीचार्ज झाल्याने वातावरण बदललं. लाठीचार्जआधी ही चर्चा व्हायला हवी होती.''

संभाजीराजे म्हणाले, न्यायिक पद्धतीने जर सरसकट बसत असेल तर सरकारने द्यायला पाहिजे. पण केवळ मराठा समाजाला खुश करण्यासाठी जीआर काढणार असाल आणि कायदेशीर टिकणार नसेल तर चालणार नाही.''  (Latest Marathi News)

ते म्हणाले की, ''2021 ला न्यायालयाने आरक्षण रद्द केलं. त्यावेळी पासून मी पत्र लिहित आहे. पहिलं पत्र उद्धव ठाकरे यांना लिहिलं. त्यानंतर एकनाथ शिंदे यांनाही पाठवलं. महाराष्ट्रातील सर्व मराठा समाजातील लोकांना सरसकट कुणबी प्रमाणपत्र मिळालं पाहिजे, ही त्यांची मागणी आहे. मुख्यमंत्र्यांसोबत त्यांची काय चर्चा झाली माहिती नाही.''

संभाजीराजे पुढे म्हणाले, ''सामाजिक मागास सिद्ध केल्याशिवाय तुम्हाला आरक्षण देता येणार नाही. सरकारने याची काळजी घ्यावी. सरकारला मी सांगत होतो, त्यांनी काही केलं नाही. ही सर्वपक्षीय बैठक आधी का घेतली नाही.'' मागासवर्गीय आयोग पुनर्गठीत करायला पाहीजे हे मी सरकारला सांगितलं, असंही ते म्हणाले आहेत.