Mumbai Crime News :

आईस्क्रीमसाठी ओळखीच्या व्यक्तीने दुसऱ्या व्यक्तीवर जीवघेणा हल्ला केल्याची घटना मुंबईतून समोर आली आहे. आईस्क्रीम घेण्यास नकार दिल्याने हा हल्ल्या केल्याची माहिती मिळत आहे. याप्रकरणी अंधेरी पोलिसांनी आरोपीला अटक केली आहे. आवेश मकरानी (२१ वर्ष) असं अटक केलेल्या आरोपीचे नाव आहे. (Mumbai News)

वसीम अकरम अब्दुल करीम खान (29 वर्ष) असं पीडित व्यक्तीचं नाव आहे. वसीमवर त्याच्या दोन मुलींसमोर हा हल्ला झाला आहे. आवेशने वसीमच्या पोटात आणि छातीत वार केले आहेत. जखमी वसीमवर सध्या रुग्णालयात उपचार सुरु आहेत. (Crime News)

पोलिसांनी दिलेल्या माहितीनुसार, अंधेरी (पश्चिम) येथील चांद कावल चाळ येथे राहणारा वसीम शनिवारी आपल्या लहान मुलींना आईस्क्रीम खाण्यासाठी बाहेर घेऊन जात होता. त्यावेळी आवेश त्याच्याजवळ आला. आवेशने मलाही एक आईस्क्रीम घे अशी मागणी वसीमकडे केली. मात्र वसीमकडे जास्त पैसे नसल्याने त्याने आईस्क्रीम घेऊन देण्यास नकार दिला. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

नकार दिल्याने संतापलेल्या आवेशने वसीमच्या पोटात, छातीवर चाकूने सपासप वार केले आणि तेथून पळ काढला. वसीम ताबडतोब घरी परतला. त्यावेळी त्याच्या भावाने त्याला विलेपार्ले येथील कूपर रुग्णालयात दाखल केले. रविवारी वसीमने आवेशविरोधात पोलिसात गुन्हा दाखल केला आहे.

आम्ही आरोपीला अटक करून न्यायालयात हजर केले. न्यायालयाने त्याला ४ जानेवारीपर्यंत पोलीस कोठडी सुनावली आहे. आरोपी हा हिस्ट्रीशीटर आहे, अशी माहिती पोलिसांनी दिली.