अक्षय बडवे (पुणे)

संस्कृती नगरी, शिस्तप्रिय नागरिकांची ओळख असलेलं पुणे शहर गेल्या काही वर्षांत झपाट्याने बदलतं आहे. पण या बदलामध्ये स्वच्छतेच्या बाबतीत पुणेकरांची उदासीनता आणि प्रशासनाची निष्क्रियता पुन्हा एकदा उघड झाली आहे. शहराच्या मध्यवर्ती ठिकाणी असलेला एस.एम. जोशी पूल सध्या कचऱ्याच्या ढिगाऱ्यामुळे अक्षरशः कचराकुंडी बनला आहे.

पुण्यातील मध्यवर्ती भागात असलेला आणि हजारो वाहनचालक तसेच पादचाऱ्यांचा रोजचा मार्ग बनलेला एस. एम. जोशी पूल सध्या कचऱ्याच्या ढिगाऱ्याने व्यापला गेला आहे. गेल्या चार दिवसांपासून या पुलावर घरगुती कचरा, प्लास्टिक पिशव्या, मोठमोठे खोके, निर्माल्य आणि इतर घाण टाकली जात आहे. मात्र, पुणे महापालिकेने हा कचरा उचलण्यासाठी काहीही कारवाई केली नसल्याने परिसरात दुर्गंधी पसरली आहे.

हा पूल मुठा नदीवर असून आबासाहेब गरवारे महाविद्यालय आणि शास्त्री रस्ता जोडणारा महत्त्वाचा दुवा आहे. त्यामुळे सकाळ-संध्याकाळ हजारो वाहनं या मार्गावरून धावतात. वाहनचालकांबरोबरच सकाळी वॉक करणारे नागरिक, मित्रमंडळींच्या गप्पांचे ग्रुप, तरुणाईचे कट्टे आणि अगदी वाढदिवस साजरे करणारे मुलं-मुली या पुलावर रोज जमून असतात. पण इतक्या गर्दीतही कोणीतरी नागरिक बेशिस्तपणे कचरा टाकतो आहे. यामुळे "नेहमी शिस्तीचा अभिमान बाळगणारे पुणेकरच आता इतके बेशिस्त झालेत का?" असा सवाल उपस्थित होतो आहे.

पुलाच्या दोन्ही बाजूंना फूटपाथ आहेत. मात्र या फूटपाथवर आता अक्षरशः कचराच कचरा दिसतो. पादचाऱ्यांना चालताना नाक दाबून जावं लागतं. कचऱ्यामुळे डास, माशा, कीटक मोठ्या प्रमाणात वाढले आहेत. पावसाळ्यात या घाणीमुळे डेंग्यू, मलेरिया, गॅस्ट्रो सारखे आजार पसरण्याचा धोका वैद्यकीय तज्ज्ञांनी व्यक्त केला आहे. आसपास राहणाऱ्या लोकांना दुर्गंधीमुळे श्वास घेणंही कठीण झालं आहे.

या पुलावर कुठलाही सीसीटीव्ही कॅमेरा नसल्यामुळे कचरा कोण टाकतो आहे हे शोधणं प्रशासनासाठी अशक्य झालं आहे. त्यामुळे महापालिकेची कारवाई करण्याची ताकद कमी पडते आहे. गेल्या चार दिवसांपासून कचरा पडून असूनही महापालिका याकडे दुर्लक्ष करत असल्याची नाराजी नागरिक व्यक्त करत आहेत. सोशल मीडियावर देखील अनेकांनी या घाणीचे फोटो टाकून महापालिकेवर ताशेरे ओढले आहेत.

दरम्यान, या पुलावर मोठ्या प्रमाणात वर्दळ असल्याने कचरा टाकणाऱ्यांना कुणी रोखत नाही हे देखील प्रश्नचिन्ह निर्माण करणारं आहे. प्रशासनाकडून तातडीने उपाययोजना होणे आवश्यक आहे. स्थानिक नागरिकांनी पुलावर सीसीटीव्ही बसवून कचरा टाकणाऱ्यांवर दंडात्मक कारवाई करावी, अशी मागणी केली आहे.