'अमित शहा यांच्या मनातील मुख्यमंत्री देवेंद्र फडणवीस नाही.', असा खळबळजनक दावा शिवसेना ठाकरे गटाचे नेते संजय राऊत (Sanjay Raut) यांनी केला आहे. माध्यमांशी संवाद साधताना संजय राऊत यांनी राज्याचे उपमुख्यमंत्री देवेंद्र फडणवीस आणि केंद्रीय गृहमंत्री अमित शहा (Amit Shah) यांच्यावर जोरदार निशाणा साधला. तसंच, 'हे सरकार मोदींचं नसून एनडीएचेच आहे.', असा देखील टोला त्यांनी पंतप्रधान नरेंद्र मोदी (PM Narendra Modi) यांना लगावला आहे.

संजय राऊत यांनी भाजपच्या आगामी मुख्यमंत्र्याविषयी प्रतिक्रिया देताना सांगितले की, 'राज्यात महायुतीकडे 7 मुख्यमंत्री आहेत. राज्यात देवेंद्र फडणवीस यांचा पाय कापून कसं मुख्यमंत्री बनवता येईल असा प्रयत्न सुरू आहे. अमित शाह यांच्या वक्तव्यावर विश्वास ठेवता येत नाही. ते कोअर कमिटीच्या बैठकीत सांगत आहेत भाजपचा मुख्यमंत्री करायचा आहे. पण अमित शाह यांच्या मनातील मुख्यमंत्री हा देवेंद्र फडणवीस नाहीत. भावी मुख्यमंत्री (तिन्ही पक्षाचे) एकमेकांचे पाय खेचणार करणार आहेत. एकमेकांचे उमेदवार पाडणार आहेत.', असे मत राऊतांनी व्यक्त केले.

संजय राऊत आजच्या अर्थसंकल्पाविषयी प्रतिक्रिया देताना मोदी सरकारवर टीका केली. त्यांनी सांगितले की, 'हे सरकार मोदींचे नसून एनडीएचे आहे. आधीची १० वर्षे मोदी सरकार होतं अस आम्ही नाही तर ते म्हणतात. निर्मला सीतारामन यांनी काही फार मोठा चमत्कार केलाय असं नाही. आमच्या अपेक्षा खूप आहेत. आधीच्या पण अपेक्षा पूर्ण झाल्या नाहीत. महागाई आणि बेरोजगारी हा देशासमोरील गंभीर प्रश्न आहे. शेतकरी, जुनी पेन्शन योजना यावर काही असेल तर आम्ही समाधानी असू.'

'आज महाराष्ट्रात सर्वात जास्त शेतकऱ्यांच्या आत्महत्या झाल्या आहेत. बिहार आणि आंध्र प्रदेश सरकारच्या टेकूवर देशातील सरकार उभे आहे. दोन राज्यांना स्पेशल राज्याचा दर्जा देण्याचं वचन दिलं होत पण ते सरकारने पाळलेल दिसत नाही. मुंबईची लूट आणि ओरबड केंद्र सरकारने थांबवली पाहिजे. मुंबईत पुन्हा एकदा आंतरराष्ट्रीय वित्त केंद्राची निर्मिती करताना सरकार दिसलं तर आम्हाला आनंद होईल.', असे मत संजय राऊत यांनी व्यक्त केले.