विकास मिरगणे, नवी मुंबई

राज्यात महापालिका सार्वत्रिक निवडणूकांच्या तारखा जाहीर झाल्या असल्या तरी पक्षपक्षातील फोडाफोडी सुरूच आहे. नवी मुंबई शहरामध्ये राष्ट्रवादी कॉंग्रेस शरद पवार गटाला खिंडार पडले असून माजी जिल्हा उपाध्यक्ष महादेव पवार यांनी शिंदेंच्या शिवसेनेत प्रवेश केला आहे. शिवसेना जिल्हाप्रमुख किशोर पाटकर यांच्या जनसंपर्क कार्यालयात हा प्रवेशाचा कार्यक्रम झाला. किशोर पाटकर यांनी शिवसेनेचा स्कॉर्फ महादेव पवार यांच्या गळ्यात टाकत, हाती भगवा देत त्यांचा शिवसेना प्रवेश केला.

यावेळी महादेव पवार यांच्या समर्थकांनी व राष्ट्रवादीच्या स्थानिक पदाधिकाऱ्यांनी व कार्यकर्त्यांनी शिवसेनेत प्रवेश केला. या कार्यक्रमास शिवसेना माजी नगरसेवक रतन मांडवे, काशिनाथ पवार उपस्थित होते. यावेळी पवार यांच्यासमवेत राष्ट्रवादीचे माजी वॉर्ड अध्यक्ष यशवंत मोहिते, प्रमोद शेळके, रविंद्र सुर्वे, राजेंद्र कोरडे, रोहिदास हाडवळे, रोहन वाघ, सोमनाथ शिंदे, राष्ट्रवादीच्या जिल्हा महिला उपाध्यक्षा सुषमा महादेव पवार, सुजाता घारे, सविता हाडवळे, संगीता सावंत, सविता यादव, राजश्री पवार यांनी शिवसेनेत प्रवेश केला.

महादेव पवार हे नेरूळ पश्चिममधील जनधार असलेले स्थानिक नेतृत्व असून त्यांचा सारसोळे, सेक्टर सहा परिसरात घरटी जनसंपर्क असून सेक्टर आठ, दहा. कुकशेत गाव, सोळा या ठिकाणीही महादेव पवार परिचित असून त्यांच्या प्रवेशामुळे नेरूळ पश्चिम परिसरात शिवसेनेला बळकटी आल्याचे मानले जात आहे. तसेच 40 पेक्षा अधिक कार्यकर्त्यांनी शरद पवार गटाला जय महाराष्ट्र करत शिवसेनेत पक्ष प्रवेश केला आहे.