संघर्ष गांगुर्डे, कल्याण

शिवसेना शिंदे गटाच्या पदाधिकाऱ्यांच्या भाजप प्रवेशानंतर पेटलेल्या वादाने कल्याण-डोंबिवलीतील राजकारण तापले असून, पक्षफोडीच्या आरोप-प्रत्यारोपांतून दोन्ही पक्षांनी एकमेकांवर जोरदार निशाणा साधला आहे. शिवसेनेच्या पत्रकार परिषदेतील टीकेला काही तासांतच भाजपनेही तितक्याच कडवेपणाने जवाबी फटके दिले.

शिवसेनेच्या पदाधिकाऱ्यांच्या भाजप प्रवेशावर आमदार राजेश मोरे व उपजिल्हाप्रमुख राजेश कदम यांनी केलेल्या आरोपांवर भाजप जिल्हाध्यक्ष नंदू परब यांनी पत्रकार परिषद घेऊन पलटवार केला. फोडाफोडीची सुरुवात आम्ही केली नाही. उलट उल्हासनगर आणि अंबरनाथमध्ये आमचे पदाधिकारी तुम्ही घेऊन गेला आहात. युती धर्म पाळण्याची जबाबदारी फक्त भाजपचीच आहे का? असा सवाल परब यांनी शिवसेनेला उद्देशून केला.

परब म्हणाले, आम्ही आतापर्यंत युती धर्म पाळला, पहिली चूक आणि दुसरीही चूक दुर्लक्षिली. पण तिसऱ्या चुकीनंतर शांत बसणारी भाजप आता नाही. तुम्ही दगड माराल तर आम्हीही जशास तसे उत्तर देऊ. आम्ही मैत्रीत पहिला घाव करत नाही; पण गरज पडल्यास प्रत्युत्तर देण्यात भाजप मागे राहणार नाही.

भाजपने यावेळी संपूर्ण तारखांसह पक्षप्रवेशाच्या घडामोडींचा तपशील मांडत शिवसेनेने आरोप केले तसे चित्र नसल्याचा दावा केला. तुम्ही आमचे पदाधिकारी घेत असताना आम्ही खासदारांचा निषेध करायचा का? असा प्रतिप्रश्नही परब यांनी उपस्थित केला.

दरम्यान, आज झालेल्या पक्षप्रवेशाबाबत भाजप प्रदेशाध्यक्ष रवींद्र चव्हाण यांनी स्वतः फोन करून चौकशी केली असल्याचे नंदू परब यांनी सांगितले. यापुढील सर्व पक्षप्रवेश आपल्या संमतीनेच होतील,असे निर्देशही चव्हाण यांनी दिल्याचे त्यांनी स्पष्ट केले. भाजप-शिवसेनेतील हा नवा संघर्ष पाहता महायुतीतील संबंधांमध्ये आणखी तणाव निर्माण होण्याची शक्यता व्यक्त केली जात आहे.