मुंबई: शिवसेना नेते एकनाथ शिंदे (Eknath Shinde) यांच्या बंडामुळे शिवसेनेत उभी फूट पडली आहे, त्यामुळे आता महाविकास आघाडीचे सरकार अडचणीत आले आहे. यावरुन आता आरोप-प्रत्यारेप सुरू आहे, या बंडापाठिमागे भाजपचा हात असल्याचा आरोप शिवसेनेने केला आहे. या पार्श्वभूमीवर आता शिवसेनेचे मुखपत्र असलेल्या 'सामना'तून शिवसेनेने भाजपवर आरोप केले आहेत. 'महाराष्ट्राचे तीन तुकडे करण्याचे काम सुरु असल्याचा आरोप करण्यात आला आहे. या बंडाळीमागे भाजपचा हात आहे, असंही या लेखात म्हटले आहे. एकनाथ शिंदे यांनी शिवसेनेच्या ४० आमदारांसह बंड केले आहे. सध्या शिंदे गट गुवाहाटीमध्ये आहे.

'शिवसेनेतील (ShivSena) बंडखोरीशी त्यांचा काहीही संबंध नाही, असे भाजपचे म्हणणे आहे. दुसरीकडे भाजपचे सरकार दोन दिवसांत येणार असल्याचे बोलले जात आहे. यात सत्य काय आहे? बंडखोर म्हणतात की आम्ही महाराष्ट्राच्या हितासाठी, हिंदुत्वासाठी भाजपसोबत जात आहोत. भाजपमुळे महाराष्ट्रावर हे संकट आले आहे. यांना महाराष्ट्राचे तुकडे करायचे आहेत, असंही या अग्रलेखात म्हटले आहे.

महाराष्ट्राचे तुकडे करण्याचे प्रयत्न

'दिल्लीत बसलेल्या भाजपच्या नेत्यांनी महाराष्ट्राचे तीन तुकडे करण्याचे धोकादायक षडयंत्र रचले आहे. महाराष्ट्राचे थेट तीन तुकडे करायचे आहेत, मुंबई वेगळी करायची आहे आणि छत्रपती शिवरायांच्या या अखंड महाराष्ट्राचा नाश करायचा आहे, महाराष्ट्राचे तुकडे करणाऱ्यांचे तुकडे करु, असे शिवसैनिक बोलले तर 'यांच्यापासून आमच्या जीवितास धोका आहे, असा बोभाटा करायचा, असंही या लेखात म्हटले आहे.

ईडीचा (ED) दबाव आणून आवाज दाबण्याचा प्रयत्न केला जात असल्याचा आरोप शिवसेनेने केला आहे. महाराष्ट्र सरकार पाडण्याचा उद्योग नक्की कोण करतंय, लोकांना 'ईडी'च्या जाळ्यात अडकवून त्यावर शिवसेना आणि सरकारच्या बाजूने उभे राहणाऱ्यांचा आवाज दाबण्याचा प्रयत्न सुरू आहे. महाराष्ट्राच्या राजकीय पटलावर हा खेळ किती दिवस चालणार, असंही या लेखात म्हटले आहे.