महाराष्ट्रातील राज्यसभेतील ७ जागांसाठी येत्या १६ मार्च रोजी निवडणूक होणार आहे. महायुतीने ७ पैकी ६ जागांवर जोरदार फिल्डिंग लावली आहे. तर महाविकास आघाडीला एक जागा जिंकण्याची संधी आहे. महाविकास आघाडीने राज्यसभेच्या एक जागेसाठी शरद पवार यांना उमेदवारी जाहीर केली आहे. महाविकास आघाडीच्या नेत्यांनी राज्यसभेसाठी संयुक्त पत्रकार परिषद घेत राज्यसभा उमेदवार म्हणून शरद पवार यांच्या नावाची घोषणा केली.

खासदार सुप्रिया सुळे आणि जयंत पाटील यांनी काही दिवसांपूर्वी उद्धव ठाकरे यांची भेट घेतली. त्यानंतर सुळे यांनी आज बुधवारी काँग्रेस नेत्यांचीही भेट घेतली. राज्यसभेच्या उमेदवारीवरून सुप्रिया सुळे यांची काँग्रेस नेत्यांशी गांधी भवनात महत्वाची चर्चा झाली. या बैठकीनंतर महाविकास आघाडीची संयुक्त पत्रकार परिषद पार पडली.

या पत्रकार परिषदेत महाविकास आघाडीकडून शरद पवार यांना राज्यसभेसाठी उमेदवारी जाहीर करण्यात आली. ही निवडणूक बिनविरोध होणार असल्याने शरद पवार यांचा राज्यसभेवर जाण्याचा मार्ग मोकळा झाला आहे.

संयुक्त पत्रकार परिषदेत सुप्रिया सुळे म्हणाल्या, 'महाविकास आघाडीतील प्रत्येक घटकाचे आभार मानते. सोनिया गांधी, राहुल गांधी, उद्धव ठाकरे, मल्लिकार्जुन खरगे, प्रियंका गांधी इत्यादी यांचे सर्वांचे आभार मानते. सर्व काँग्रेस नेत्यांचे आभार मानते. मी आणि जयंत पाटील यांनी काल उद्धव ठाकरे यांची भेट घेतली. दोन तास चर्चा केली. काँग्रेस, शिवसेनेने मोठ्या मनाने शरद पवार यांना संधी दिल्याने आभार मानते. आम्ही अनेक वर्ष एकत्र काम करत आहे.

'आम्ही एक जबाबदार विरोधी पक्ष म्हणून काम करत आहोत. महाराष्ट्रात जेव्हा आव्हाने येतात, तेव्हा आम्ही एकत्र येतो. आम्ही सातत्य ठेवून काम करत राहणार आहोत. शरद पवारांवर डॉक्टरांनी चांगले उपचार केले. त्यामुळे त्यांना आज डिस्चार्ज मिळाला आहे. पुढील काही दिवसांत, तुम्हाला माहीत आहे की शरद पवार दौरे करण्यासाठी किती उत्सुक असतात. ते महाराष्ट्र आणि देशाच्या सेवेला लागतील, असेही सुळे यांनी सांगितले.