Ambernath News:अंबरनाथहून सकाळी ठाण्याच्या दिशेने लोकल प्रवास करणारे प्रवासी किरण यादव हे त्यांची लॅपटॉप आणि काही महत्वाचे साहित्य असणारे बॅग लोकलमध्ये विसरले. रेल्वे पोलिसांच्या दक्षतेमुळे केवळ पाऊण तासांत लोकलमध्ये गहाळ झालेली लॅपटॉपची बॅग प्रवाशाला मिळाली आहे. (Latest Marathi News)

अंबरनाथ शहराच्या पश्चिम भागात किरण यादव राहतो. आज सकाळी नेहमीप्रमाणे किरण यांनी अंबरनाथ येथून १०.३५ ची बदलापूर-सीएसएमटी लोकल गाडीने प्रवास सुरु केला. मात्र ठाणे स्थानकात उतरल्यावर त्यांची बॅग गाडीतच राहिल्याचे त्यांच्या लक्षात आले. मात्र तो पर्यंत गाडी निघून गेली असल्याने त्यांना बॅग घेणे शक्य झाले नाही.

यानंतर त्यांनी लागलीच १५१२ या रेल्वे पोलिसांच्या मदत क्रमांकावर संपूर्ण प्रकाराची माहिती दिली.यानंतर ठाणे रेल्वे पोलीस दलाचे पोलीस निरीक्षक पंढरी कांदे आणि मुंबई रेल्वे पोलीस दलाचे निरीक्षक विजय तायडे यांनी रेल्वे पोलिसांना सूचना देत संबंधित लोकलची तपासणी करण्याचे आदेश दिले.

यावेळी पोलिसांनी मस्जिद बंदर येथे लोकलधून बॅग ताब्यात घेतली.यानंतर किरण यादव यांना मस्जिद बंदर येथील रेल्वे पोलीस स्थानकात बॅग स्वाधीन केली. बॅगमध्ये सुमारे ४० हजार रुपये किमतीचा लॅपटॉप आणि इतर काही महत्वाचे साहित्य होते. केवळ पाऊण तासाच्या कालावधीत बॅग मिळाल्याने किरण यांनी पोलिसांचे आभार मानले.

दरम्यान, किरण यादव यांना त्यांचा लॅपटॉप मिळाल्याने रेल्वे पोलिसांचं कौतुक होत आहे. रेल्वे पोलिसांच्या दक्षतेचे कौतुक होत आहे.