कल्याण-डोंबिवली महापालिकेने बेकायदा बांधकामे रोखण्यात अपयश आल्याचा ठपका ठेवत अधिकाऱ्यांवर निलंबनाची कारवाई करण्यात आलीय. मांडा-टिटवाळा प्रभागातील बेकायदेशीर बांधकामांवर कारवाई न केल्यामुळं सहाय्यक आयुक्त संदीप रोकडे यांना निलंबित करण्यात आलंय. केडीएमसीचे अतिरिक्त त्यांच्या निलंबनाचे आदेश जारी केले आहेत.

कल्याण डोंबिवली महापालिकेने शहरातील अनधिकृत बांधकामांवर कारवाई करण्याचे आदेश संबंधीत अधिकाऱ्यांना दिले होते. मात्र, त्यानंतरही केडीएमसीच्या अ प्रभाग क्षेत्र अंतर्गत असलेल्या टिटवाळा मांडा परिसरात मोठ्या प्रमाणात अनधिकृत बांधकामे सुरू असल्याचं दिसून येत होते. याबाबत अनेकदा तक्रारी करूनही अनधिकृत बांधकामाबाबात ठोस पावलं उचलली गेली नाहीत.

याच कारणामुळे केडीएमसी प्रशासनाकडून तत्कालीन संबंधित सहाय्यक आयुक्त संदीप रोकडे यांच्यावर कारवाईचा बडगा उगारला आहे. पालिकेच्या आदेशांची प्रभावी अंमलबजावणी झाली नसल्यानं ही कठोर पावलं उचलण्यात आली असल्याची माहिती समोर आली आहे.

केडीएमसीचे अतिरिक्त आयुक्त हर्षल गायकवाड यांनी संदीप रोकडे यांच्या निलंबनाचे आदेश जारी केले आहेत. या कारवाईमुळे महापालिकेच्या अधिकाऱ्यांमध्ये खळबळ उडाली असून, गेल्या काही दिवसांपासून गाजत असलेल्या ६५ बेकायदेशीर बांधकाम प्रकरणी प्रशासन तत्कालीन संबंधित अधिकऱ्यांवर कारवाई करणार का? याकडे नागरिकांचे लक्ष लागले आहे.