संघर्ष गांगुर्डे, कल्याण

कल्याण पश्चिमेतील एका हायप्रोफाईल सोसायटीत निवृत्त पोलीस अधिकाऱ्याने धुमाकूळ घातल्याची घटना समोर आली आहे. महिलांशी गैरवर्तन, अश्लील शिवीगाळ आणि सोसायटीच्या पदाधिकाऱ्यांना मारहाण केल्याप्रकरणी कल्याणच्या महात्मा फुले पोलीस ठाण्यात गुन्हा दाखल करण्याची प्रक्रिया सुरू आहे. ही सर्व घटना सीसीटीव्ही कॅमेऱ्यात कैद झाली आहे.

मिळालेल्या माहितीनुसार, ८ एप्रिल २०२६ रोजी रात्री ८:३० च्या सुमारास वल्लभ टॉवर येथे राहणाऱ्या एक महिला लहान मुलाला घेऊन बाहेर जाण्यासाठी आपली दुचाकी पार्किंगमधून बाहेर काढत होत्या. यावेळी सोसायटीतच राहणारे निवृत्त पोलीस अधिकारी बी. एल. पवार यांनी मुद्दाम आपली गाडी महिलेच्या गाडीमागे लावली. वारंवार हॉर्न वाजवूनही त्यांनी गाडी बाजूला घेतली नाही आणि तक्रारदार महिलेकडे पाहण्यास सुरुवात केली.

यानंतर तिला शिवीगाळ केली. ​या वादाचे रूपांतर पुढे मोठ्या हाणामारीत झाले. सोसायटीचे लोक जमा झाले असता, आरोपीने सर्वांना अश्लील शिवीगाळ करण्यास सुरुवात केली. यावेळी सोसायटीतील महिला व इतर सदस्याने त्यांना विरोध केला असता त्यांना देखील शिवीगाळ केली, त्याचबरोबर त्यांना विरोध करणाऱ्या पुरुषांना देखील मारहाण केली.

तक्रारदार महिलेचा विनयभंग करून अत्यंत खालच्या पातळीवर जाऊन तिच्या चारित्र्याबद्दल घाणेरडे शब्द वापरले, असल्याचे आरोप करत तक्रार या महिलेने केली आहे.याप्रकरणी पोलिसांनी गुन्हा दाखल करण्याची प्रक्रिया सुरु असून पोलीस तपास करत आहेत.