गिरीश निकम, साम टीव्ही

कल्याण : कल्याणमध्ये 13 वर्षांच्या अल्पवयीन मुलीवर अत्याचार करुन तिची हत्या करणाऱ्या नराधम विशाल गवळीने तुरुंगातच आत्महत्या केली. गेल्या साडेतीन महिन्यांपासून तो तळोजा कारागृहात होता. रविवारी पहाटेच्या सुमारास विशाल गवळीने स्वच्छतागृहीत टॉवेलच्या सहाय्याने आत्महत्या केली. दरम्यान विशालच्या आत्महत्येवर त्याच्या बहिणीने संशय व्यक्त केलाय तर आम्हाला न्याय द्या अशी मागणी विशालच्या आईने केलीये. दुसरीकडे अक्षय शिंदेसारखं विशाल गवळीला मारण्यात आलं असा संशय आरोपीच्या वकिलांनीही व्यक्त केलाय.

नराधम विशाल गवळीची आत्महत्या

अल्पवयीन मुलीला घरात बोलावून लैंगिक अत्याचार

मुलीची निर्घृणपणे हत्या करत मृतदेह बॅगेमध्ये कोंबला

चिमुरडीच्या मृतदेहाची विल्हेवाट लावण्यासाठी बायकोची साथ

गेल्या साडे तीन महिन्यापासून विशाल गवळी तळोजा जेलमध्ये

रविवारी पहाटे टॉवेलने गळफास घेत जीवन संपवलं

नराधम विशालने जे कृत्य केलं होतं, त्याची शिक्षा त्याला देवाने दिली. त्याच्यासोबत 'जशास तसा' न्याय झाला, असं पीडित मुलीच्या वडिलांनी म्हटलं. पीडितेला आणि तिचा कुटुंबाला नैसर्गिक न्याय मिळाल्याचे कल्याणचे आमदार विश्वनाथ भोईर आणि आमदार सुलभा गायकवाड यांनी म्हटले आहे. या घटनेमुळे कल्याण परिसरात संतापाची लाट उसळली होती. अक्षय शिंदेसारखाच विशाल गवळीचाही एन्काउंटर करा अशी मागणी कल्याणमधल्या महिलांनी केली होती. आता यापुढे तरी अशी घटना घडू नयेत म्हणून गुन्हेगारांना जरब बसेल असा कायदा करण्याची अपेक्षा व्य़क्त होतेय.