कल्याण अभिजित देशमुख

Kalyan News:

कल्याणमधील सुभाष मैदानाच्या दुरवस्थेबाबत मनसेने आक्रमक पवित्रा घेतलाय. आज दुरवस्थेबाबत या मैदानात सह्यांची मोहीम राबवत मनसेने पालिका अधिकाऱ्यांना मैदानाच्या दुरावस्थेचे फोटो भेट दिलेत. मैदानाच्या दुरवस्थेबाबत अधिकाऱ्यांना जाब विचारत येत्या आठ दिवसात मैदान सुस्थितीत करा अन्यथा मैदानातील कचरा घाण अधिकाऱ्यांच्या दालनात टाकू असा इशारा मनसेने दिलाय.

कल्याणमधील सुभाष मैदानाची मोठ्या प्रमाणात दुरावस्था झालीय. सुभाष मैदानातील जॉगिंग ट्रॅकवर ड्रेनेजचे पाणी येते,मैदानात अस्वच्छतेचे साम्राज्य आहे, स्वच्छतागृहाची दुरवस्था आहे, महिलांसाठी चेंजिंग रूम नाही. त्यामुळे मैदानात खेळण्यास येणाऱ्या खेळाडूंना विविध समस्यांना सामोरे जावे लागते.

खेळाडूंनी याबाबत अनेकदा तक्रारी केल्या मात्र महापालिकेकडून दुर्लक्ष होत असल्याचा आरोप केला जातोय. याबाबत मनसेने आक्रमक पवित्रा घेतलाय. आज मनसेचे माजी आमदार व शहर अध्यक्ष प्रकाश भोईर, जिल्हाध्यक्ष उल्हास भोईर यांच्या नेतृत्वाखाली मनसेच्या शिष्टमंडळाने महापालिकेचे अधिकारी संजय जाधव यांची भेट घेत मैदानाच्या दुरावस्थेबाबत त्यांना जाब विचारला.

महापालिका मुख्यालयापासून हाकेच्या अंतरावर असलेल्या मैदानाची ही अवस्था तर इतर मैदानाचं काय? असा सवाल त्यांनी केलाय. यावेळी मैदानाच्या दुरावस्थेचे फोटो अधिकाऱ्यांना भेट देण्यात आलेत. तसेच मैदान सुस्थितीत करण्यासाठी आठ दिवसांचा अल्टीमेटम दिलाय. ८ दिवसांत मैदानाचे काम पूर्ण करावे अन्यथा मैदानातील घाण कचरा अधिकाऱ्यांच्या दालनात टाकू असा इशारा दिला आहे.