Kalyan Crime:

कल्याणच्या मोहने परिसरात गोळीबार करणाऱ्या आरोपीला कल्याण गुन्हे शाखेनं अवघ्या २४ तासात अटक केलीय. काल कल्याणच्या मोहने परिसरात गोळीबाराची घटना घडली होती. या गोळीबारात सुशील मोहंतो हा तरुण या जखमी झाला होता. या घटनेनंतर हल्लेखोर पसार झाला होता. परंतु गुन्हे शाखेनं अवघ्या २४ तासात उमेश खानविलकर या आरोपीला बेड्या ठोकल्यात. (Latest Crime News)

याप्रकरणी पोलिसांनी दिलेल्या माहितीनुसार, उमेश आणि सुशील यांच्यात आधीपासून वाद होता. काल हे दोघे आपल्या काही मित्रांसह दारू पार्टी करत होते. यावेळी जुन्या वादातून उमेशने गोळीबार केला होता. कल्याण जवळ असलेल्या मोहने परिसरातील एका घरात सुशील मोहंतो आणि उमेश खानविलकर हे आपल्या मित्रासोबत मद्य पार्टी करत होते. सुशील आणि उमेश मध्ये जुना वाद होता. या पूर्ववैमनस्यातून उमेशनं सुशीलवर गोळ्या झाडल्या.

सुशीलने बचावासाठी हात पुढे केला असता गोळी त्याचा हात फाडून त्याच्या तोंडात गेली. जखमी झालेल्या सुशीलला उल्हासनगरच्या मध्यवर्ती रुग्णालयात उपचारासाठी दाखल करण्यात आलं. गोळीबारानंतर उमेश पसार झाला होता. याप्रकरणी खडकपाडा पोलीस ठाण्यात गुन्हा दाखल करण्यात आला. कल्याण क्राईम ब्रँचदेखील या आरोपीचा शोध घेत होते.

उमेश शहाड परिसरात लपून बसला असून तो तेथून पळून जाण्याच्या तयारीत असल्याची माहिती कल्याण क्राईम ब्रँचला मिळाली. या माहितीच्या आधारे पोलिसांनी या परिसरात सापळा रचत उमेशला अटक केली. दरम्यान उमेशने बंदूक कुठून आणली याचा तपास खडकपाडा पोलीस करत आहेत .