संघर्ष गांगुर्डे, कल्याण

Kalyan Shahad Bridge Accident Doctor Death कल्याण आणि शहाडला जोडणाऱ्या पुलावर आयशर टेम्पोने दुचाकीला जोरदार धडक देऊन भीषण अपघात झाला. या अपघातात दुचाकीवरून जाणाऱ्या एका डॉक्टरचा दुर्दैवी मृत्यू झाल्याची बातमी समोर आली आहे. या प्रकरणी पोलिसांनी टेम्पो चालकाला अटक करून न्यायालयात हजर केले असून त्याला १४ दिवसांची न्यायालयीन कोठडी सुनावण्यात आली आहे.

मिळालेल्या माहितीनुसार, मृत डॉक्टर यांचे नाव सोमनाथ पाटील असे आहे. डॉक्टर पाटील हे आपल्या दुचाकीने रात्री उशिरा कल्याण आणि शहाडला जोडणाऱ्या पुलावरून प्रवास करत होते. यादरम्यान एका आयशर टेम्पोने डॉक्टर पाटील यांच्या दुचाकीला जोरदार धडक दिली.

ही धडक इतकी भीषण होती की, डॉक्टर पाटील यांचा जागीच मृत्यू झाला. या घटनेनंतर परिसरात हळहळ व्यक्त करण्यात येत आहे. हा अपघात होताच आजूबाजूच्या नागरिकांनी घटनास्थळी धाव घेतली.

उपस्थित जमावापैकी काहींनी याबाबत पोलीस ठाण्यात माहिती दिली. मिळालेल्या माहितीच्या आधारे पोलिस घटनास्थळी उपस्थित झाले. या प्रकरणी टेम्पो चालक बॉबी चंदन जुनी याला अटक करण्यात आली. पुढील कारवाईसाठी त्याला कल्याण न्यायालयात हजर करण्यात आले असता न्यायालयाने त्याला १४ दिवसांची न्यायालयीन कोठडी सुनावली.