अमरावती एक्स्प्रेसमधील प्रवाशांच्या हातावर मारला फाटका

हातावर फटका मारून चोरला मोबाईल

चोरट्याला कल्याण लोहमार्ग पोलिसांनी ठोकल्या बेड्या

संघर्ष गांगुर्डे, साम टीव्ही

मध्य रेल्वेच्या कल्याण भागात पुन्हा फटका गँग सक्रिय झाली आहे. मध्य रेल्वेवरील शहाड ते आंबिवली रेल्वे स्थानकादरम्यान धावणाऱ्या अमरावती एक्स्प्रेसमध्ये प्रवाशांच्या हातावर बांबूने फटका मारून मोबाईल चोरणाऱ्या गुन्हेगाराच्या मुसक्या आवळण्यात आल्या आहेत. सराईत चोरट्याला कल्याण लोहमार्ग पोलिसांनी मोठ्या शिताफीने अटक केली आहे. अटक करण्यात आलेल्या आरोपींकडून चोरीस गेलेला मोबाईलही हस्तगत करण्यात आलाय.

काही दिवसांपूर्वी अमरावती एक्स्प्रेसमधून प्रवास करणाऱ्या एका प्रवाशाच्या हातावर बांबूने फटका मारून त्याचा मोबाईल खाली पाडण्यात आला होता. मोबाईल पडताच आरोपीने लंपास केला होता. या प्रकरणी पीडित प्रवाशाने कल्याण लोहमार्ग पोलीस ठाण्यात तक्रार दाखल केली होती.

तक्रारीनंतर लोहमार्ग पोलिसांनी घटनास्थळ परिसरातील माहिती गोळा करून तपास सुरू केला. आरोपी पुन्हा अशाच प्रकारचा गुन्हा करण्याच्या तयारीत असल्याची माहिती पोलिसांना मिळाली. त्यानुसार पोलिसांनी सापळा रचून हसन दारा जफर या फटका गँगच्या सदस्याला रंगेहाथ ताब्यात घेतले.

चौकशीदरम्यान आरोपीकडून पीडित व्यक्तीचा चोरीस गेलेला मोबाईल जप्त करण्यात आलाय. तसेच आरोपीने यापूर्वी अशाच पद्धतीने आणखी किती मोबाईल चोरी केले आहेत, याबाबतही पोलिसांकडून सखोल तपास सुरू आहे. या तपासातून आणखी गुन्ह्यांची उकल होण्याची शक्यता व्यक्त करण्यात येत आहे.

ही कारवाई वरिष्ठ पोलीस निरीक्षक पंढरीनाथ कांदे यांच्या मार्गदर्शनाखाली कल्याण लोहमार्ग पोलीस पथकाने केली आहे. आरोपीकडून अधिक माहिती मिळविण्यासाठी पुढील तपास सुरू आहे. पोलिसांच्या या कारवाईमुळे रेल्वे प्रवाशांमध्ये समाधान व्यक्त करण्यात येत आहे.