संघर्ष गांगुर्डे, कल्याण

Kalyan East Builders Encroachment Land कल्याण पूर्वेतील द्वारली पाडा परिसरातील गुरे चरणाऱ्या जमिनीवर भूमाफिया आणि बिल्डरांनी अतिक्रमण केल्याचा गंभीर आरोप करण्यात आला आहे. याप्रकरणी सामाजिक कार्यकर्ते आणि स्थानिक रहिवाशांनी अनोख्या पद्धतीने आंदोलन केले. तक्रारदार नागरिकांनी थेट म्हैस घेऊन केडीएमसीच्या आय प्रभाग कार्यालयात धडक देत प्रशासनाला निवेदन दिले.

या वेळी आंदोलकांनी म्हैस कार्यालयाबाहेर उभी करून निषेध व्यक्त केला. द्वारली पाडा परिसरातील गुरचरण जमिनीवर पालिका अधिकाऱ्यांच्या संगनमताने भूमाफिया आणि बिल्डरांनी सुमारे ७० ते ८० अनधिकृत चाळी उभारल्याचा आरोप आंदोलकांनी केला. या अतिक्रमणामुळे गुरे चारण्यासाठी असलेली मोकळी जागा पूर्णपणे नष्ट झाल्याचेही नागरिकांनी सांगितले.

गुरचरण जागा अतिक्रमणामुळे संपली असून आता गुरांना चारण्यासाठी जागाच उरलेली नाही. त्यामुळेच प्रशासनाला वास्तव दाखवण्यासाठी म्हैस घेऊन आंदोलन करण्याची वेळ आमच्यावर आली आहे, असे आंदोलकांनी सांगितले.

तसेच, संबंधित अनधिकृत बांधकामांवर तातडीने कारवाई करून ती जमीन मोकळी करण्यात यावी, अशी मागणीही करण्यात आली. अन्यथा येत्या काळात सर्व गुरे घेऊन थेट पालिका आयुक्तांच्या बंगल्यासमोर सोडण्याचा इशाराही आंदोलकांनी दिला आहे.