संघर्ष गांगुर्डे, कल्याण

दुकानासमोर सुरू असलेल्या शिवीगाळीचा जाब विचारणे एका महिलेला आणि तिच्या मुलीला चांगलेच महागात पडले. शिवीगाळ करणाऱ्या तरुणांना जाब विचारल्याच्या रागातून महिलेसह तिच्या मुलीला आणि दुकानदाराला मारहाण केल्याची घटना कल्याण पूर्वेतील नेतिवली परिसरात घडली आहे. या संपूर्ण घटनेचा थरारक प्रकार परिसरातील सीसीटीव्ही कॅमेऱ्यात कैद झाला असून, त्याचे फुटेज सध्या समोर आले आहे.

मिळालेल्या माहितीनुसार, नेतिवली परिसरातील एका किराणा दुकानासमोर काही तरुणांचा जमाव होता. यावेळी संबंधित तरुणांकडून मोठमोठ्याने शिवीगाळ सुरू होती. दुकानाजवळ सुरू असलेल्या या प्रकारामुळे परिसरातील नागरिकांमध्ये नाराजी होती. दरम्यान, एका महिलेने पुढे येत तरुणांना शिवीगाळ का करत आहात, असा जाब विचारला. महिलेने जाब विचारल्याने त्यापैकी एक तरुण संतप्त झाला. त्यानंतर त्याने महिलेशी वाद घालत तिच्यावर हात उगारल्याचे सांगण्यात येत आहे. हा प्रकार पाहून महिलेची मुलगी आणि दुकानदार मध्ये पडले. मात्र, वाद वाढत गेला आणि संबंधित तरुणाने महिलेसह तिच्या मुलीलाही मारहाण करायला सुरुवात केली. दुकानदारालाही मारहाण करण्यात आल्याचे समोर आले आहे.

अचानक झालेल्या या प्रकारामुळे परिसरात काही काळ गोंधळाचे वातावरण निर्माण झाले. मारहाण सुरू असताना स्थानिक नागरिकांनी तातडीने हस्तक्षेप केला. नागरिकांनी मध्यस्थी करत महिला आणि तिच्या मुलीची सुटका केली. त्यानंतर जखमी महिला आणि तिच्या कुटुंबीयांनी या घटनेची माहिती पोलिसांना दिली. या प्रकरणी महिलेने कोळशेवाडी पोलीस ठाण्यात तक्रार दाखल केली आहे. पोलिसांनी याप्रकरणी एनसीआर नोंद केली असून, घटनेचा पुढील तपास सुरू आहे.

दरम्यान, या मारहाणीचा संपूर्ण प्रकार सीसीटीव्हीमध्ये कैद झाला आहे. फुटेजमध्ये संबंधित व्यक्तींकडून मारहाण होत असल्याचे दिसून येत असल्याने पोलिसांकडून या सीसीटीव्हीची तपासणी केली जात आहे. सीसीटीव्ही फुटेज आणि तक्रारीच्या आधारे पोलिसांकडून पुढील कारवाई केली जात आहे.