संघर्ष गांगुर्डे, कल्याण

कल्याण मधून मोठी बातमी समोर आली आहे. कल्याण रेल्वे परिसरात एक तोतया पोलीस व्हिजिलन्स इन्स्पेक्टरचा पर्दाफाश करण्यात आला आहे. या तोतया इन्स्पेक्टरने अडकलेले पैसे काढून देतो, असे आमिष दाखवत तब्बल ६० हजार रुपयांची मागणी केली होती. याप्रकरणी सापळा रचून पोलिसांनी मोठी कारवाई केली आणि तोतया पोलिसाला बेड्या ठोकल्या. या आरोपीचे नाव हरीश कांबळे असे आहे.

मिळालेल्या माहितीनुसार, हरीश कांबळे हा स्वतःला रेल्वे व्हिजिलन्स इन्स्पेक्टर असल्याचे भासवत होता. संबंधित बुकिंग क्लार्कचे रेल्वेच्या डीआरएम कार्यालयात अडकलेले पैसे काढून देतो, असे आमिष दाखवत त्याने तब्बल ६० हजार रुपयांची मागणी केली होती.

या प्रकरणाची माहिती रेल्वे व्हिजिलन्स विभागाला मिळाली. माहिती मिळताच रेल्वे व्हिजिलन्स विभागाने तात्काळ कारवाईचे पाऊल उचलले. व्हिजिलन्स पथकाने सापळा रचून बुकिंग क्लार्ककडून २० हजार रुपये स्वीकारण्याचा बनाव रचला. ठरल्याप्रमाणे सापळा रचून पोलिसांनी हरीशला घेराव घातला. त्याच्याकडे २० हजार रुपये घेऊन एक माणूस पाठवला. आरोपीने रक्कम स्वीकारताच पोलिसांची खात्री पटली.

लगेचच व्हिजिलन्स पथकाने त्याला रंगेहाथ पकडले. त्यानंतर हरीश कांबळेला कल्याण रेल्वे पोलिसांच्या ताब्यात देण्यात आले. या प्रकरणी पुढील चौकशी सुरू असून, आरोपीने यापूर्वीही अशा प्रकारे फसवणूक केली आहे का, याचा तपास रेल्वे पोलीस करत आहेत.या धक्कादायक प्रकारानंतर खळबळ उडाली आहे.