संघर्ष गांगुर्डे, साम टीव्ही, प्रतिनिधी

Kalyan News : कल्याणच्या बारावे परिसरामध्ये दोन दिवसांपूर्वी एका कचराकुंडीमध्ये गोणीत गुंडाळलेले स्त्री जातीचे अर्भक सापडले होते. यामुळे परिसरात मोठी खळबळ उडाली होती. पोलिसांच्या तपासात हे अपत्य अनैतिक संबंधातून जन्माला आल्याचे स्पष्ट झाले. बाळाला कचऱ्यात फेकणाऱ्या पंधरा वर्षीय अल्पवयीन आईला पोलिसांनी ताब्यात घेतल उपचारासाठी रुग्णालयामध्ये दाखल करण्यात आले आहे. या प्रकरणी रोहित पांडे या २२ वर्षीय तरुणाला खडकपाडा पोलिसांनी अटक केली आहे.

मिळालेल्या माहितीनुसार, कल्याण पश्चिमेकडील बारावे परिसरात दोन दिवसांपूर्वी सकाळच्या सुमारास कचराकुंडीलगत कचऱ्यातून लहान बाळाचा रडण्याचा आवाज येत होता. स्थानिक नागरिकांनी निरखून पाहिल्यानंतर त्यांना एका गोणीत एका दिवसांचे स्त्री जातीचे अर्भक असल्याचे आढळले. नागरिकांनी बाळाला उचलून खडकपाडा पोलिसांना याबाबतची माहिती दिली.

पोलिसांनी तातडीने घटनास्थळी धाव घेत बाळाला बालसंगोपन केंद्रात पाठवले आणि बाळाला कचऱ्यात फेकणाऱ्या आईवडिलांचा शोध सुरु केला. आजूबाजूचे सीसीटीव्ही फुटेज तसेच परिसरात चौकशी केल्यानंतर समोर आलेले सत्य पाहून पोलिसांनाच धक्का बसला. या बाळाला एका १५ वर्षीय अल्पवयीन मुलीने जन्म दिल्याचे पोलिसांना तपासात समजले.

पोलिसांनी दिलेल्या माहितीनुसरा, ही अल्पवयीन मुलगी घरात एकटीच राहते. ती अनाथ असून तिचे आजी-आजोबा गावी राहतात. मुलगी घरी एकटी असल्याची फायदा घेत आरोपीने तरुणीशी मैत्री वाढवली. त्यांच्या प्रेमसंबंधातून मुलगी गर्भवती राहिली. गर्भवती राहताच नऊ महिने तिला घराबाहेर पडण्यास मज्जाव केला. बाळाला जन्म दिल्यानंतर ते बाळ आरोपीने कचराकुंडीत फेकले. यानंतर आरोपी फरार झाला. पोलिसांनी या घटनेचा छडा लावत आरोपीला टिटवाळा परिसरातून अटक केली.