संघर्ष गांगुर्डे, डोंबिवली प्रतिनिधी

क्रीडा विश्वातून धक्कदायक बातमी समोर आली आहे. राष्ट्रीय फुटबॉलपटू लक्ष्मण गुंडप यांचा मोठा अपघात झाला आहे. या अपघातात गुंडप यांना मोठ्या प्रमाणावर दुखापत झाली आहे. दरम्यान फुटबॉलपटू लक्ष्मण गुंडप यांना पुढील १० महिने चालता येणार नसल्याचं डॉक्टरांनी सांगितले आहे. या घटनेने गुंडप यांना मोठा फटका बसला आहे.

मिळालेल्या माहितीनुसार, डोंबिवली पूर्वेतील जिमखाना रोडवरून लक्ष्मण गुंडप आपल्या मुलासोबत क्रीडांगणावर सरावासाठी निघाले होते. मुलगा सायकलवर आणि गुंडप दुचाकीवर होते. याच दरम्यान विरुद्ध दिशेने आलेल्या भरधाव कारने प्रथम मुलाला, मग गुंडप यांना धडक दिली. धडकेनंतर त्यांना १५ ते २० मीटरपर्यंत फरफटत नेलं. या अपघातात गुंडप यांच्या पायाला गंभीर दुखापत झाल्याने शस्त्रक्रिया करण्यात आली आहे.

या अपघातामुळे गुंडप यांचा आतापर्यंत ५ लाख रुपये खर्च झाला असून पुढील उपचारही करावे लागणार आहेत. डॉक्टरांनी त्यांना १० महिने चालता येणार नाही, असं डॉक्टरांनी सांगितलं आहे. त्यांच्या सामाजिक कार्यावरही याचा मोठा परिणाम झाला आहे. विशेष म्हणजे अपघातानंतर अनेक दिवस उलटले तरी पोलिसांना आरोपीचा शोध लागलेला नाही.

संबंधित अपघाताप्रकरणी कारचा नंबर असूनही, “चालक सापडत नसल्याने आत्ता गुंडप आणि त्यांच्या कुटुंबाकडून संताप व्यक्त करण्यात येत आहे. या प्रकरणी लवकरात लवकर आरोपीला अटक करून कठोर शिक्षा करावी, अशी मागणी गुंडप आणि त्यांच्या कुटुंबियांकडून करण्यात येत आहे. दरम्यान राष्ट्रीय फुटबॉलपटू लक्ष्मण गुंडप यांना न्याय मिळणार का हे पाहणं महत्त्वाचं ठरेलं.