सुशांत सावंत -

मुंबई: राज्यातील प्रशासकीय यंत्रणा केंद्रीय यंत्रणांच्या नावाने वसूलीचे षडयंत्रत रचत असेल तर त्याची चौकशी केली जाईल अशी घोषणा राज्याचे गृहमंत्री दिलीप वळसे पाटील यांनी केली आहे. या प्रकरणी चौकशी करण्याची मागणी भाजपा नेते आमदार आशिष शेलार यांनी केली होती. गृहमंत्र्यांनी ती मान्य करीत चौकशीची घोषणा केलीये.

राज्याच्या पोलीस (Police) दलातील सौरभ त्रिपाठी (Saurabh Tripathi) हे आयपीएस अधिकारी आंगडीया या व्यापाऱ्याकडून आयकर अधिकारी असल्याचे भासवून वसुली करीत असल्याचे उघड झाल्यानंतर राज्य शासनाने सौरभ त्रिपाठी यांना निलंबित केले. या कारवाईचे स्वागत करताना भाजप (BJP) आमदार आशिष शेलार (Ashish Shelar) यांनी एका गंभीर बाबीकडे आज विधानसभेत (Vidhansabha) सरकारचे लक्ष वेधले.

या प्रकरणानंतर राज्यातील प्रशासकीय यंत्रणा अशा प्रकारे केंद्रीय यंत्रणांच्या (Central Agency) नावाचा वापर करुन वसुली तर करीत नाही ना, केंद्रीय यंत्रणांना बदनाम करण्याचे षडयंत्र तर राज्यातील प्रशसकीय यंत्रणेमध्ये शिजत तर नाही ना, त्रिपाठी सारखे अन्य कोणी अधिकारी वसुली तर करीत नाही ना, त्यांच्या पाठीशी कोण उभे आहे की काय, असे अनेक प्रश्न आता उपस्थित होत आहेत. असे असेल तर महाराष्ट्राची आणि देशाची बदनामी होण्याची शक्यता आहे. त्यामुळे ही गंभीर बाब असून याप्रकरणी तातडीने शासनाने दखल देऊन आवश्यकता असल्यास चौकशी करावी, अशी मागणी आशिष शेलार यांनी केली होती.

त्यावर उत्तर देताना गृहमंत्री दिलीप वळसे पाटील (Dilip Walse Patil) यांनी याची शासन दखल घेत असून चौकशी केली जाईल, अशी घोषणा केली.

Edited By - Nupur Uppal