हिंदी भाषा सक्तीच्या मुद्द्यावरून राजकारण चांगलेच तापले आहे. हिंदी भाषा सक्तीला अनेक राजकीय पक्षांनी विरोध केला. राज ठाकरे, संजय राऊत, शरद पवार यांनी या भाषेला विरोध करत प्रतिक्रिया दिली. शरद पवार यांनी आज या मुद्द्यावर पहिली प्रतिक्रिया देत फडणवील सरकारवर तोफ डागली. शरद पवार यांना भाजपचे नेते आणि राज्याचे उच्च व तंत्रशिक्षण मंत्री चंद्रकांत पाटील यांनी त्यांना प्रत्युत्तर दिले आहे. 'पवार म्हणतात म्हणजे परमेश्वर म्हणतात असं नाही ना.', अशा शब्दात त्यांनी शरद पवारांवर टीका केली.

हिंदी भाषेच्या मुद्द्यावर प्रतिक्रिया देताना चंद्रकांत पाटील यांनी सांगितले की, 'प्रत्येक विषयाचे राजकारण करण्याची आवश्यकता नाही. समाजकारण शोधा.राज्यात हिंदी सक्ती झालेली नाही. इंग्लिश कशी काय जगाची भाषा आहे? जगात जायचं तर इंग्लिश पाहिजे असं का? तिसरी भाषा म्हणून हिंदीचा आग्रह नाही. तुम्ही इंग्लिशविरोधात आंदोलन करत नाहीत. १५० वर्षे ज्यांनी राज्य केलं त्यांची भाषा चालते आणि हिंदीला विरोध करताय. असं असेल तर इंग्लिशला विरोध करा.'

तसंच, 'इथे लोकशाही आहे ठोकशाही नाही. ज्याला शिकायचं आहे त्याला शिकू द्या ना. शिकवू देणार नाही पाट्या फोडू हे काय योग्य नाही. पवार म्हणतात म्हणजे परमेश्वर म्हणतात असं नाही ना. ही इस नॉट गॉड, ही इस गुड मॅन, ही इस एक्सपीरियन्स मॅन.', असं इंग्रजीमध्ये म्हणत चंद्रकांत पाटील यांनी पवारांवर निशाणा साधला. 'उद्यापासून पवार सांगतील पांढरा शर्ट घाला असं होणार नाही.', असा देखील टोला त्यांनी लगावला.

शरद पवार यांनी बारामतीमध्ये पत्रकारांशी संवाद साधताना हिंदी भाषा सक्तीवर पहिल्यांदाच प्रतिक्रिया दिली. त्यांनी हिंदी भाषा सक्तीच्या मुद्द्यावरून थेट फडणवीस सरकारवर तोफ डागली. त्यांनी सांगितले की, 'हिंदीची सक्ती असू नये. जे हवं आहे ते करावं पण सक्ती नको. पालकांनी जे मार्गदर्शन केलं आहे त्याप्रमाणे निर्णय घ्यावा.'