Mumbai Rain Local Train News: राज्यातील अनेक जिल्ह्यांमध्ये सध्या मुसळधार पाऊस कोसळत आहे. मुंबईत गुरूवारपासून पावसाची संततधार सुरू होती. शुक्रवारी सकाळी मुंबईसह उपनगरात पावसाचा जोर आणखीच वाढला. मुसळधार पावसाचा फटका मुंबईची जीवनवाहिनी म्हणून ओळखल्या जाणाऱ्या लोकल सेवेलाही बसला आहे. पावसामुळे लोकल ट्रेन (Mumbai Local Train) १५ ते २० मिनिटं उशीराने धावत आहे.

लोकल धीम्या गतीने सुरू असल्याने प्रवाशांचे प्रचंड हाल होत आहे. अनेक ठिकाणी रेल्वे रुळावर पावसाचं पाणी साचल्याने मध्य आणि हार्बर रेल्वेच्या (Harbar Line) काही ट्रेन १०-१५ मिनिटं उशीराने धावत आहे. याशिवाय पश्चिम रेल्वेवरील वाहतूक १० मिनिट उशिराने सुरू आहे.

रस्ते वाहतूकही मंदावली, वाहनांच्या लांबच लांब रांगा

दुसरीकडे ठाणे ते मुंबईच्या (Mumbai News) दिशेने वाहनांच्या लांबच लांब रांगा दिसत आहे. मुलुंड टोल नाक्यावरील वाहतूक धीम्या गतीने सुरू आहे. या भागात रस्त्यांची कामे झाली असली, तरी वाहने धीम्या गतीने जात आहे. त्यामुळे पावसात प्रवास करणाऱ्या चाकरमान्यांना वाहतूक कोंडीचा त्रास सहन करावा लागत आहे

अंधेरी सबवेमध्ये साचलं पावसाचं पाणी

अंधेरीत देखील जोरदार पाऊस कोसळत असून त्यामुळे सखल भागात पाणी साचण्यास सुरुवात झाली आहे. अंधेरी पूर्व पश्चिमेला जोडणाऱ्या सबवेमध्ये देखील पाणी साचले आहे. सबवेमध्ये चार फुटांपर्यंत पाणी साचल्यामुळे अंधेरी सब वेमधून वाहनांना जाण्यास मनाई करण्यात आली आहे.

मुंबईत पावसाचा जोर वाढणार

येत्या तीन ते चार तासांत मुंबईसह (Mumbai Rain Alert) राज्यात पावसाचा जोर वाढणार, असा अंदाज हवामाना खात्याने वर्तवला आहे. हवामान खात्याच्या अंदाजनुसार, रायगड, पालघर आणि पुणे येथे ३० जून रोजी मुसळधार ते अति मुसळधार पाऊस पडण्याची शक्यता आहे. तसेच मुंबई, ठाणे, रत्नागिरी, नाशिक आणि सातारा येथे काही ठिकाणी मुसळधार पाऊस पडण्याची शक्यता आहे.

Edited by - Satish Daud