दिलीप कांबळे, मावळ

देशभरात भाऊबीजेचा सण उत्साहात साजरा होत असतानाच, मावळच्या टाकवे बुद्रुक गावातील एका वीटभट्टीवर काम करणाऱ्या मजुरांच्या संसारातही आज आनंदाचा दिवा पेटला. बीड जिल्ह्यातून रोजगाराच्या शोधात आलेले हे कष्टकरी कामगार, आपल्या घरापासून दूर असले तरी संस्कार मात्र पिढ्यानपिढ्या हृदयात घट्ट रुजलेले.

मावळच्या टाकळी बुद्रुक येथील वीटभट्टीच्या ओसाड माळावर, लाल मातीच्या पार्श्वभूमीवर, छोट्या मुलींनी थरथरत्या हातांनी आपल्या भावांना ओवाळलं. काहींकडे ओवाळणीचे पैसे नव्हते, भेटवस्तू नव्हत्या, पण प्रेम आणि ममतेचा तो सोहळा मात्र सोन्याहून पिवळा ठरला. पैसे नव्हत तरी भावबंध दृढ होता; भेटवस्तू नव्हत्या, तरी आपुलकी ओसंडून वाहत होती.

या साध्या पण हृदयस्पर्शी दृश्याने उपस्थितांच्या डोळ्यांत नकळत पाणी आले. शहरात झगमगाटात हरवलेली नाती, इथे मातीत आणि घामात फुलताना दिसली. मावळच्या मातीतल्या या वीटभट्टीवर आज खरी “भाऊबीज” साजरी झाली. सोन्या-चांदीत नाही, तर प्रेमाच्या निखळ बंधनात.