या प्रकरणात फुरसुंगी पोलीस ठाण्याचे वरिष्ठ पोलीस निरीक्षक अमोल मोरे यांच्या कार्यपद्धतीवर शेतकऱ्यांनी गंभीर आक्षेप नोंदवले आहेत. त्यांच्या भूमिकेची स्वतंत्र व निष्पक्ष चौकशी करून दोष आढळल्यास निलंबनाची कारवाई करावी, अशी मागणी निवेदनाद्वारे करण्यात आली.पुणे जिल्ह्यातील फुरसुंगी येथे शेतजमिनीच्या संरक्षणासाठी उभारण्यात आलेले कंपाऊंड पोलिसांसमोर तोडण्यात आल्याचा आरोप करत न्यायाच्या मागणीसाठी शेतकऱ्यांनी थेट मंत्रालय गाठले. फुरसुंगी पोलीस ठाण्यात न्याय मिळत नसल्याचा आरोप करत शेतकरी दत्तात्रय हरपळे, अतुल हरपळे आणि शोभा हरपळे यांनी आज महाराष्ट्राचे गृहराज्यमंत्री योगेश कदम यांची मंत्रालयात भेट घेतली. यावेळी शेतकऱ्यांनी आपली व्यथा मांडत संबंधित प्रकरणात तातडीने हस्तक्षेप करण्याची मागणी केली.

मौजे फुरसुंगी, ता. हवेली, जि. पुणे येथील गट क्रमांक १४५/११ मधील शेतजमिनीवर उभारण्यात आलेले पत्र्याचे कंपाऊंड तोडण्यात आल्याचा शेतकऱ्यांचा आरोप आहे. विशेष म्हणजे, ही घटना पोलिसांसमोर घडल्याचे सांगत संबंधित प्रकरणात अपेक्षित कायदेशीर कारवाई झाली नसल्याची तक्रार शेतकऱ्यांनी केली. उलट, स्वतःच्या जमिनीचे संरक्षण करण्यासाठी पुढाकार घेतल्यानंतर शेतकऱ्यांवरच गुन्हे दाखल झाल्याचा आरोपही त्यांनी केला.

शेतकऱ्यांनी गृहराज्यमंत्री योगेश कदम यांच्यासमोर आपली बाजू मांडल्यानंतर, मंत्र्यांनी पुणे पोलीस आयुक्त अमितेश कुमार यांना या प्रकरणात तातडीने लक्ष घालण्याचे निर्देश दिल्याचे शेतकऱ्यांनी सांगितले. संबंधित शेतकऱ्यांना त्वरित पोलीस संरक्षण उपलब्ध करून देऊन त्यांचे तोडण्यात आलेले कंपाऊंड पूर्ववत उभारण्यासाठी आवश्यक कार्यवाही करावी, असे निर्देश दिल्याची माहिती आहे.

मंत्रालयातील भेटीनंतर आता शेतकऱ्यांना पोलीस संरक्षण मिळून कंपाऊंड पुन्हा उभारले जाणार का आणि संबंधित पोलीस अधिकाऱ्यांच्या भूमिकेची निष्पक्ष चौकशी होणार का, याकडे सर्वांचे लक्ष लागले आहे.

शेतकऱ्यांच्या म्हणण्यानुसार, त्यांच्या जमिनीच्या हक्कांचे संरक्षण व्हावे, तक्रारीची निष्पक्ष चौकशी व्हावी आणि त्यांच्यावर दाखल झालेल्या गुन्ह्यांची कायदेशीर तपासणी करण्यात यावी, या प्रमुख मागण्या आहेत.