डोंबिवली : कल्याण शीळ रोडवरील गोदामाचे शटर उचकटून गोदामातील 8 लाख 43 हजाराची रक्कम असलेला लॉकर चोरट्यानी चोरून नेला होता. यातील 6 आरोपींना यापूर्वीच अटक करण्यात आली होती. यातील मुख्य फरार आरोपी आकाश उर्फ बटल्या सिंग (वय 21) याला अडीच वर्षानंतर अटक करण्यात कल्याण गुन्हे अन्वेषन विभागाला यश आले आहे. आकाश याच्यावर आधीही बदलापूर आणि शिवाजीनगर पोलीस ठाण्यात एकूण 6 गुन्हे दाखल आहेत.  

हे देखील पहा -

कल्याण शिळफाटा रोडवरील डी. एस. ऐजन्सी हे गोदाम नोव्हेंबर 2018 मध्ये काही चोरट्यानी फोडले होते. या गोदामातील लॉकरच चोरट्यानी पळवून नेला होता. मानपाडा पोलीस ठाण्यात गुन्हा दाखल होताच पोलिसांनी जानेवारी 2019 मध्ये चोरीच्या गुन्ह्यातील 6 आरोपींना अटक करत त्यांच्याकडून 5 लाख 45 हजाराचा मुद्देमाल हस्तगत केला होता. यातील मुख्य आरोपी आकाश हा मात्र पोलिसांच्या हातावर तुरी देत होता.

कल्याण गुन्हे अन्वेषण विभागाकडे याचा तपास जाताच वरिष्ठ पोलीस निरीक्षक विलास पाटील यांनी सहाय्यक पोलीस निरीक्षक भूषण दायमा, पोलीस उपनिरीक्षक मोहन कळमकर, पोलीस हवालदार दत्ताराम भोसले यांच्या पथकाने गुप्त बतमीदारांमार्फत आकाशचा ठिकाणा शोधून काढला. बदलापूर येथेच आकाश असल्याचे समजताच सापळा रचुन बुधवारी 25 ऑगस्टला ताब्यात घेतले.

आज कल्याण जिल्हा सत्र न्यायालयात त्याला हजर केले असता दोन दिवसांची पोलीस कोठडी सुनावण्यात आली आहे.आकाश हा सराईत गुन्हेगार असून तपासात त्याच्यावर बदलापूर पोलीस ठाणे व शिवाजीनगर पोलीस ठाण्यात प्रत्येकी 3 असे 6 गुन्हे दाखल असल्याचे पोलिसांनी सांगितले.

Edited By : Krushnarav Sathe