- सचिन जाधव

Pune News : सैन्यदलात भरतीचे आमिष दाखवून युवकांची सुमारे पावणेदोन कोटी रुपयांची फसवणूक केल्याची घटना उघडकीस आली आहे. सदर्न कमांडच्या लायझन युनिटने या घटनेचा पर्दाफाश केला आहे. सदर्न कमांडच्या लायझन युनिट आणि कोंढवा पोलिसांनी संयुक्त कारवाई करीत संशयिताला शुक्रवारी तासगाव येथून अटक केली. (Maharashtra News)

फेब्रुवारी २०२२ ते १५ सप्टेंबर २०२३ या कालावधी हा प्रकार घडला. कोंढव्यातील एका हॉटेलमध्ये फिर्यादीची कराळे साेबत ओळख झाली. कराळेने सैन्यदलात वरिष्ठ अधिकारी माझ्या ओळखीचे असून, भरतीसाठी कोणी मित्र, नातेवाईक असतील तर सांगा,असे फिर्यादी यांना सांगितले.

त्यावर त्याने एका उमेदवाराच्या भरतीसाठी सहा लाख रुपये लागतील असे सांगितले अशा प्रकारे फिर्यादीने ४२ युवकांना भरतीसाठी पैसे देण्यास तयार केले. फिर्यादीने इच्छुक उमेदवारांकडून एक कोटी ८० लाख रुपये घेऊन कराळेला दिले.

कराळेने युवकांकडून (youth) लाखो रुपये आणि मूळ कागदपत्रे घेऊन त्यांची फसवणूक केल्याचे पोलीस तपासात समोर आले.

त्यानंतर पाेलीसांनी या प्रकरणी कोंढवा पोलिस स्टेशनमध्ये येथे पांडुरंग कराळे (वय ४५, रा. पाटील मळा, तासगाव, जि. सांगली) याच्याविरुद्ध गुन्हा दाखल केला. त्याला शुक्रवारी तासगाव येथून अटक करण्यात आली आहे.

Edited By : Siddharth Latkar