राग अनावर झाला नाही तर काय घडू शकतं हे पुण्यात घडलेल्या घटनेतून समोर आल आहे. पुण्यातील कोंढवा परिसरात एका तरुणाचा ई-स्कूटरबाबतचा संताप टोकाला पोहोचला. अवघ्या महिन्याभरात खराब झालेली इलेक्ट्रिक स्कूटर वारंवार तक्रारी करूनही दुरुस्त न झाल्यामुळे संबंधित तरुणाने थेट सर्व्हिस सेंटरमध्ये स्कूटर पेटवून दिली. ही घटना सोमजी चौकातील साई सर्व्हिस सेंटरमध्ये घडली.

पोलिसांनी दिलेल्या माहितीनुसार, चिरायु चंद्रकांत घोणे यांनी त्यांच्या वडिलांसाठी ई-स्कूटर घेतली होती. मात्र काही दिवसांतच ती बंद पडली आणि वारंवार फॉलोअप करूनही कंपनीकडून कोणतीच ठोस मदत मिळाली नाही. २१ जुलै रोजी त्यांना कळवण्यात आलं की, स्कूटरची मोटार खराब झाली असून ती मोफत बदलली जाईल. मात्र ती कधी मिळेल, हे न सांगता वेळ मारून नेण्यात आला.

घोणे हे २३ जुलै रोजी पुन्हा सर्व्हिस सेंटरमध्ये गेले आणि उत्तर न मिळाल्यामुळे त्यांनी कर्मचारी व अधिकाऱ्यांशी वाद घातला. नंतर थोड्याच वेळात ते मोटारसायकलमधून पेट्रोलची बाटली घेऊन आले आणि आपल्या स्कूटरवर पेट्रोल ओतून तिला पेटवून दिलं. या घटनेत स्कूटर पूर्णतः जळून खाक झाली असून साई सर्व्हिस सेंटरचे व्यवस्थापक जालिंदर विठ्ठल नेवसे यांनी कोंढवा पोलीस ठाण्यात फिर्याद दाखल केली आहे. कोंढवा पोलीस ठाण्यात घोणे यांच्याविरुद्ध गुन्हा दाखल करण्यात आला असून पुढील तपास सुरु आहे.