सागर आव्हाड, साम टीव्ही

पुणे : आगामी स्थानिक स्वराज्य संस्थेच्या निवडणुकीच्या पार्श्वभूमीवर राजकीय घडामोडींना वेग आला आहे. विरोधकांसहित सत्ताधारी पक्षांनी राजकीय पक्षांनी मोर्चेबांधणीला सुरुवात केली आहे. काही राजकीय पक्षांचे पक्षप्रवेश सुरु आहेत. पुण्यातही सत्ताधारी शिंदे गटाने नेते-कार्यकर्त्यांची मोट बांधायला सुरुवात केली आहे. पुण्यात आज मंगळवारी काँग्रेस आणि राष्ट्रवादी काँग्रेसच्या नेत्यांच्या एकनाथ शिंदे यांच्या शिवसेनेत प्रवेश होणार आहे. त्यामुळे आगामी निवडणुकीच्या पार्श्वभूमीवर पुण्यात एकनाथ शिंदे यांची ताकद वाढणार असल्याचं बोललं जात आहे.

पुण्यात शिंदेंच्या शिवसेनेने निवडणुकीची जोरदार तयारी सुरु केली आहे. पुण्यात शिंदेंच्या कार्यकर्त्यांना बैठकांचा सपाटा लावला आहे. या निवडणुकीच्या पार्श्वभूमीवर पुण्यातीत दोन दिग्गज नेते शिंदेंच्या शिवसेनेत प्रवेश करणार आहे. एकनाथ शिंदे यांच्या उपस्थितीत दोन्ही दिग्गज नेते पक्षप्रवेश करणार आहेत.

पुण्यातील काँग्रेसच्या प्रदेश सचिव सोनाली मारणे, राष्ट्रवादी काँग्रेस (शरद पवार गट) चे माजी नगरसेवक राहुल तुपेरे, काँग्रेसचे शहर सरचिटणीस किरण मारणे, राष्ट्रवादीचे युवक सचिव आकाश कुसाळकर, पुणे शहर काँग्रेसचे सचिव संदीप शर्मा यांच्यासहित सामाजिक कार्यकर्ते गिरीश जैवळ,प्रसन्न पाटील यांचा शिवसेनेत अधिकृत प्रवेश होणार आहे.

पुण्यातील दिग्गज नेत्यांच्या पक्षप्रवेशामुळे राजकारणात मोठी घडामोड पाहायला मिळत आहे. पुण्यातील दिग्गज नेत्यांच्या एन्ट्रीमुळे आगामी निवडणुकीच्या पार्श्वभूमीवर शिंदेच्या शिवसेनेची ताकद वाढणार असल्याचं बोललं जात आहे.

सुधाकर बडगुजर यांचा भाजपमध्ये प्रवेश

नाशिकमधील सुधाकर बडगुजर यांनी भाजपमध्ये प्रवेश केलाय. बडगुजर यांच्या पक्षप्रवेशामुळे भाजपची ताकद वाढल्याचं बोललं जात आहे. बडगुजर यांची काही दिवसांपूर्वी ठाकरे गटातून हकालपट्टी केली होती. त्यानंतर आज मंगळवारी बडगुजर यांनी भाजपमध्ये प्रवेश केला आहे. त्यांच्या पक्षप्रवेशावेळी भाजपचे दिग्गज नेते उपस्थित होते.