Eknath Shinde Group Lok Sabha 2023 Election Strategy

आगामी लोकसभा निवडणुकीसाठी सर्वच राजकीय पक्षांनी जोरदार मोर्चबांधणी सुरू केली आहे. कोणत्या मतदारसंघात आपला उमेदवार निवडून येईल, याची चाचपणी सध्या केली जात आहे. शिंदे गटाने देखील लोकसभेसाठी रणनीती आखली असून निवडणुकीत ज्येष्ठ महिला आणि ज्येष्ठ नागरिकांना नजरेसमोरच ठेवूनच प्रचाराची तयारी करण्यात येणार आहे. (Latest Marathi News)

मुख्यमंत्री एकनाथ शिंदे (CM Eknath Shinde) यांच्या नेतृत्वाखाली सोमवारी शिंदे गटाची बैठक झाली. या बैठकीत २२ लोकसभा जागांचा आढावा घेण्यात आल्याची माहिती शिंदे गटाचे खासदार राहुल शेवाळे यांनी आढावा बैठकीनंतर दिली. लोकसभा निवडणुकीसाठी आम्ही सज्ज आहोत, असं शेवाळे यांनी सांगितलं आहे.

लोकसभेच्या २२ मतदारसंघांत शिवसेनेचा खासदार (Shivsena) निवडून कसा येईल, यावर भर दिला जाणार आहे. विद्यमान १३ खासदारांचा निर्णय झाला आहे. उर्वरित ठिकाणी उमेदवारीबाबत भाजप आणि राष्ट्रवादीसोबत चर्चा करून मुख्यमंत्री एकनाथ शिंदे निर्णय घेतील, असंही राहुल शेवाळे म्हणाले.

दरम्यान, गेल्या निवडणुकीत शिवसेनेने राज्यातील ४८ पैकी २२ लोकसभा जागांवर उमेदवार उभे केले होते. त्यापैकी १८ जागा जिंकल्या होत्या. शिवसेनेतील बंडानंतर १३ खासदार मुख्यमंत्री एकनाथ शिंदे यांच्यासोबत आहेत. या खासदारांना लोकसभा निवडणुकीच्या तयारीला लागण्याच्या सूचना मुख्यमंत्री शिंदे यांनी दिल्या आहेत.

लोकसभेसाठी शिंदे गटाकडून प्रत्येक मंत्र्यावर दोन ते तीन जिल्ह्यांची जबाबदारी दिली जाणार आहे, त्याचबरोबर महिला आणि ज्येष्ठ नागरिकांसाठी असलेल्या विविध योजना प्रत्येक मतदारसंघात कशा प्रकारे राबविता येतील, याच्या सूचना खासदार आणि मंत्र्यांना देण्यात आल्या, असेही राहुल शेवाळे यांनी सांगितले आहे.