नितीन पाटणकर, साम टीव्ही

Lalit Patil Health Updates

ड्रग्ज माफिया ललित पाटील याची तब्येत बिघडल्याची माहिती आहे. ललित पाटील याला पोट दुखी आणि हर्नियाचा त्रास सुरू झाला आहे. गेल्या ४ दिवसापासून ललित पाटीलला हा त्रास होत असल्याचं सांगण्यात येतंय. त्यामुळे पुणे पोलिसांकडून त्याला उपचारासाठी ससून रुग्णालयातच नेलं जात आहे. रुग्णालयात ऍडमिट न करता लित पाटीलवर उपचार करण्यात येत आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

नियमित उपचारानंतर त्याची रवानगी पुन्हा कोठडीत केली जात आहे. ललित पाटील (Lalit Patil) याला कोणताही गंभीर आजार नाही, पण त्याला पोटदुखी आणि हरण्याचा त्रास होतोय, असं पोलिसांकडून सांगण्यात आलं आहे. ललित पाटील हा मूळ नाशिकचा रहिवासी आहे.

पुणे पोलिसांनी (Pune Police) त्याला ड्रग्ज प्रकरणात अटक केली होती. विशेष म्हणजे ललित पाटील याला पोलिसांनी ड्रग्ज प्रकरणात अटक केल्यानंतर तो जेलमध्ये कैद होता. तो येरवडा कारागृहात गेल्या तीन वर्षांपासून कैद होता.

या कालावधीत ललित पाटील ९ महिने पुण्यातील ससून रुग्णालयात उपचाराच्या निमित्ताने दाखल होता. तिथे उपचार सुरू असताना अचानक ललित पाटील फरार झाला होता. त्याच्या फरार होण्याचे सीसीटीव्ही फुटेजही समोर आले होते. पोलिसांनी प्रचंड तपास करुन त्याला 15 दिवसांनी अटक केली.

या प्रकरणावरुन राजकीय वातावरण देखील तापलं आहे. ठाकरे गटाच्या नेत्या सुषमा अंधारे यांनी या प्रकरणात सरकारमधील दोन मंत्र्यांचा हात असल्याचा आरोप केला होता. दरम्यान, पुणे पोलिसांनी ललित पाटील याच्या घरावरही छापा टाकला होता. या छापेमारीत पोलिसांना ड्रग्जचा मोठा साठा सापडला होता. ललित पाटील हा खूप मोठा ड्रग्ज पेडलर होता हे समोर आलं होतं.