अभिजीत देशमुख, साम टीव्ही प्रतिनिधी

कल्याण :- डोंबिवलीत सार्वजनिक बांधकाम मंत्री रविंद्र चव्हाण यांच्या विरोधात बॅनरबाजी केल्याने राजकीय वातावरण तापलं आहे . रविंद्र चव्हाण यांचा शुक्रवारी वाढदिवस होता. या निमित्ताने डोंबिवली शहरात काही बॅनर लावण्यात आले होते. या बॅनरवर '२० सप्टेंबर हॅप्पी खड्डे डे, डोंबिवलीकर" असा मजकूर लिहिला होता. हे बॅनर कुणी लावले कुणाच्या सांगण्यावरून लावण्यात आले, याबाबत विविध चर्चा रंगल्या.

सार्वजनिक बांधकाम मंत्री रविंद्र चव्हाण यांच्या विरोधात लावण्यात आलेले बॅनर पोलिसांनी उतरवून घेतले. यानंतर पोलिसांनी बॅनर छापणाऱ्या जॉली प्रिंटरच्या विरोधात गुन्हा दाखल केला आहे. कोणाच्या सांगण्यावरुन हे बॅनर लावण्यात आले आहे. याचा तपास विष्णूनगर पोलिसांनी सुरु केला आहे.

काय आहे नेमकं प्रकरण?

सार्वजनिक बांधकाम मंत्री रवींद्र चव्हाण यांचा आज वाढदिवस असल्याने अनेक ठिकाणी त्यांच्या समर्थकांनी बॅनर लावले होते. अनेक समर्थकांनी त्यांना बॅनरमार्फत शुभेच्छा दिल्या. मात्र डोंबिवली पश्चिमेत काल रात्रीच्या सुमारास काही ठिकाणी असे बॅनर लावले गेले. ज्या बॅनरवर सार्वजनिक बांधकाम मंत्री यांना लक्ष्य करण्यात आलं होतं. या वादग्रस्त बॅनरमुळे शहरातील वातावरण चांगलंच तापलं होतं. बॅनर छापण्याचे आणि लावण्याचे काम जॉली प्रिटंरला दिले होते.

विष्णूनगर पोलिसांनी रात्रीच हे बॅनर उतरवून बॅनर छापणाऱ्या आणि लावणाऱ्या जॉली प्रिंटरच्या विरोधात गुन्हा दाखल केला. हा बॅनर कोणी छापण्यास दिला होता. याचा तपासाकरिता दोन पथके नेमली आहेत. लवकरच बॅनर लावणाऱ्याचे नाव समोर येईल, याची शक्यता आहे. हा बॅनर डोंबिवली पश्चिमेतील सध्या शिवसेना शिंदे गटात असलेल्या पदाधिकाऱ्याने लावल्याची माहिती सूत्रांनी दिली आहे. त्यामुळे कल्याण डोंबिवली शिवसेना शिंदे गट आणि भाजपमध्ये वाद आता विकोपाला जाण्याची शक्यता आहे.