अभिजित देशमुख, प्रतिनिधी

Dombivli News:

डोबिंवलीमधून एक काळीज पिळवटून टाकणारी घटना समोर आली आहे. डोंबिवलीच्या मानपाडा परिसरात प्ले झोनमध्ये खेळत असताना खाली पडून पाच वर्षीय मुलाचा दुर्दैवी मृत्यू झाल्याची घटना घडली. परिसरातील हायप्रोफाईल रिजेन्सी अनंतम कॉम्प्लेक्सच्या क्लब हाऊस मध्ये ही घटना घडली. सक्षम उंडे असे या चिमुकल्याचे नाव असून या घटनेने परिसरात हळहळ व्यक्त केली जात आहे.

याबाबत अधिक माहिती अशी की, डोंबिवली पूर्वेकडे (Dombivli East) मानपाडा परिसरात (Manpada) रीजन्सी अनंत या हायप्रोफाईल सोसायटीमध्ये भरत उंडे हे आपल्या कुटुंबासह राहतात. त्यांना सक्षम हा पाच वर्षाचा मुलगा आहे.

काल सायंकाळी (३१,ऑक्टोंबर) साडेपाच वाजण्याच्या सुमारास सक्षम हा या कॉम्प्लेक्सच्या क्लब हाऊसमधील प्लेझोन मध्ये खेळण्यासाठी गेला होता. यावेळी खेळत असताना तो अचानक खाली पडला. जवळच काम करणाऱ्या कामगारांचे सक्षमकडे लक्ष गेल्याने त्यांनी सक्षमला तात्काळ रुग्णालयात नेले मात्र उपचारापूर्वीच त्याचा मृत्यू झाला होता.

सक्षम हा भरत उंडे यांचा एकुलता एक मुलगा होता. एकुलत्या एका मुलाचा मृत्यू झाल्याने कुटुंबावर दुःखाचा डोंगर कोसळला आहे. या घटनेमुळे परिसरात हळहळ व्यक्त करण्यात येत आहे. याप्रकरणी मानपाडा पोलीस ठाण्यात नोंद करण्यात आली आहे. पोलीस याबाबत अधिक तपास करत आहेत. (Latest Marathi News)

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)