संघर्ष गांगुर्डे, साम टीव्ही

डोंबिवली शहरात एटीएम फसवणुकीचे प्रकार पुन्हा एकदा समोर येत असून, एका निवृत्त महिला अधिकाऱ्याला भामट्यांनी चकवून तब्बल 55 हजार रुपयांची फसवणूक केल्याची धक्कादायक घटना घडली आहे. डोंबिवली पूर्वेतील मानपाडा रोड परिसरात राहणाऱ्या छाया देशपांडे या ज्येष्ठ नागरिक मुंबई महानगरपालिका येथील निवृत्त अधिकारी आहेत. नेहमीप्रमाणे त्या पेन्शन काढण्यासाठी इंदिरा चौकाजवळील बँक ऑफ महाराष्ट्र च्या एटीएममध्ये गेल्या होत्या.

यावेळी एटीएममध्ये उपस्थित असलेल्या अज्ञात भामट्याने बँक कर्मचारी असल्याची सांगून मदतीच्या बहाण्याने त्यांना फसवले. कार्ड बदलण्याची चलाखी करत आरोपीने त्यांच्या हातातील मूळ एटीएम कार्ड घेऊन दुसऱ्या बँकेचे कार्ड त्यांच्या हातात दिले. हा प्रकार लक्षात येण्याआधीच आरोपीने त्यांच्या खात्यातून 55 हजार रुपये काढून तेथून पसार झाला. मी नेहमीप्रमाणे पेन्शन काढायला गेले होते. एका व्यक्तीने मदत करण्याच्या बहाण्याने माझे कार्ड बदलले. नंतर मला समजले की माझ्या खात्यातून पैसे काढले गेले आहेत अशी माहिती छाया देशपांडे यांनी दिली आहे

घटनेनंतर छाया देशपांडे यांनी संबंधित बँकेत तसेच पोलिसांकडे तक्रार दाखल केली असून, पोलिसांनी या प्रकरणाचा तपास सुरू केला आहे. एटीएममधील सीसीटीव्ही फुटेजच्या आधारे आरोपीचा शोध घेतला जात आहे.एटीएममध्ये व्यवहार करताना अनोळखी व्यक्तींची मदत घेऊ नये, तसेच आपले कार्ड आणि पिन कोणालाही देऊ नये, असे आवाहन पोलिसांकडून करण्यात आले आहे.