मिठी नदी गाळ उपसा कथित गैरव्यवहार प्रकरणात अभिनेता डिनो मोरियाची मुंबई पोलिसांच्या आर्थिक गुन्हे शाखेने आज चौकशी केली. सकाळी चौकशीसाठी बोलावण्यात आलेल्या डिनो मोरियाची तब्बल 6 तास 45 मिनिटे चौकशी करण्यात आली. चौकशी पूर्ण झाल्यानंतर पोलिसांनी त्याला सोडले.

तपासादरम्यान आर्थिक गुन्हे शाखेच्या हाती लागलेल्या काही महत्त्वाच्या धाग्यांच्या आधारे डिनो मोरियाकडे आज प्रश्नोत्तर करण्यात आल्याची माहिती आहे. यावेळी त्याचा जबाबही नोंदवण्यात आला. तसेच, तपासाशी संबंधित काही कागदपत्रे आर्थिक गुन्हे शाखेकडे सादर करण्यास मोरियाला सांगण्यात आल्याची माहिती समोर आली आहे. या प्रकरणात डिनो मोरियाला सध्या अटक करण्यात आलेली नाही, तर केवळ चौकशी करण्यात आली आहे.

मिठी नदीतील गाळ उपशाच्या कथित गैरव्यवहार प्रकरणात याआधीही डिनो मोरियाची चौकशी करण्यात आली होती. तपास पुढे जात असताना आवश्यकतेनुसार त्यांना पुन्हा चौकशीसाठी बोलावले जाऊ शकते, अशी माहिती सूत्रांकडून मिळत आहे. दरम्यान, आजच्या चौकशीनंतर आर्थिक गुन्हे शाखेच्या कार्यालयातून बाहेर पडताना डिनो मोरिया यांना पोलिसांनी सोडले.