वैदेही काणेकर, साम प्रतिनिधी

मुंबई : लोकसभा निवडणुकीचे निकाल येण्यासाठी काही तास उरलेत. त्याचदरम्यान एक मोठी बातमी समोर आलीय. उपमुख्यमंत्री देवेंद्र फडणवीसांनी मनसे अध्यक्ष राज ठाकरे यांची भेट घेतलीय. निकालाआधी दोन्ही नेत्यांची भेट होत असल्याने अनेकांच्या नजरा या भेटीकडे लागलेत.

देवेंद्र फडणवीस यांची ही भेट सदिच्छा असल्याचं म्हटलं जातं आहे. पण लोकसभा निवडणुकीचा निकाल आणि त्यानंतर होणाऱ्या विधानसभा निवडणुका आणि तोंडावर आलेल्या शिक्षक पदवीधर मतदारसंघाच्या निवडणुका पाहता ही भेट महत्त्वाची मानली जातेय.

फडणवीस आणि राज ठाकरे यांच्या भेटी मागे सर्वात पहिलं कारण हे पदवीधर मतदारसंघाची निवडणूक असल्याचं म्हटलं जात आहे. कोकण पदवीधर मतदारसंघासाठी मनसेनं अभिजीत पानसे यांना उमेदवारी दिलीय. तर दुसरीकडे भाजपकडून निरंजन डावखरे यांना उमेदवारी देण्यात आलीय. डावखरे हे देवेंद्र फडणवीसांच्या जवळचे मानले जातात.

यासंदर्भातही फडणवीस आणि राज ठाकरे यांच्यात चर्चा होऊ शकते. दुसरं कारण हे लोकसभा निवडणुकीच्या आधीच गणित, लोकसभा निवडणुकीच्या निकालानंतरचे गणित, विधान परिषद तसेच पदवीधर आणि शिक्षक मतदारसंघाच्या निवडणुका याबाबत दोघात चर्चा होण्याची शक्यता आहे.