मुंबई: शिंदे-फडणवीस मंत्रिमंडळचा विस्तार झाला, काल या मंत्र्यांचे खातेवाटपही झाले. यावरुन आता आरोप-प्रत्यारोपाच्या फैरी सुरू आहेत. खातेवाटपावर आता विरोधी पक्षनेते अजित पवार (Ajit Pawar) यांनी प्रतिक्रिया दिली. महाराष्ट्र राज्याचा कुठल्याही खात्याचा मंत्री होणे महत्त्वाची गोष्ट आहे, वजनदार खाती तुमच्या भाषेत असतात. माझ्यासाठी सर्व खाते समसमान आहेत, आणि जर एखाद्या माणसाची कुवत नसेल आणि त्याला जर मलाईदार खाते मिळाले तर ते खातच योग्य पद्धतीने चालणार नाही, अशी प्रतिक्रिया विरोधी पक्षनेते अजित पवार यांनी दिली.

'जोपर्यंत १४५ चा बहुमताचा आकडा आहे, तोपर्यंत हे सरकार राहिल. आमचे सरकार असताना सांगितले जात होते की, २५ वर्षांचे हे सरकार राहील. कार्यकर्त्यांना खुष करण्यासाठी असे बोलावे लागते. पण कोणीही ताम्रपट घेऊन आलेले नाही हे लक्षात ठेवावे. बहुमता मधला एक आकडा जरी कमी झाला तरी सरकार कोसळू शकते, असंही अजित पवार (Ajit Pawar) म्हणाले.

यावेळी अजित पवार यांनी सुधीर मुनगंटीवार यांनी केलेल्या 'वंदे मातरम' या घोषणेवर प्रतिक्रिया दिली. सांस्कृतिक मंत्री म्हणून सुधीर मुनगंटीवार यांनी वंदे मातरम बोलण्यासाठी घोषणा केली आहे. पण ठाकरे सरकार असताना त्यावेळेस जय महाराष्ट्र हे फोन केल्यावर वापरले जायचे. नवीन सरकार आल्यानंतर आता वंदे मातरम बोलले जात आहे. आम्ही सभागृहात विचारू की वंदे मातरम कशासाठी वापरले जात आहे. जर योग्य असेलतर त्याला विरोध करण्याचे कारण नाही, असंही अजित पवार (Ajit Pawar) म्हणाले.

पंतप्रधान नरेंद्र मोदी यांनी आज केलेल्या भ्रष्टाचाराच्या संदर्भात बोलताना अझित पवार म्हणाले, भ्रष्टाचार हा कुणालाही नको आहे. पंतप्रधान असतील किंवा कुठलाही नागरिक असेल देशातला भ्रष्टाचार करणेच अयोग्य आहे, असंही अजित पवार (Ajit Pawar) म्हणाले.