नितीन पाटणकर, साम टीव्ही प्रतिनिधी

पुणे : पूजा खेडकर अडचणीत आणखी वाढ झाली आहे. पूजा खेडकर प्रकरणाचा तपास करण्यासाठी दिल्ली पोलिसांची गुन्हे शाखा पुण्यात पोहोचली आहे. सोमवारी दिवसभर दिल्ली पोलिसांच्या गुन्हे शाखा पथकाने पुण्यात पूजा खेडकर प्रकरणाचा तपास केला आहे. त्यामुळे आता पूजा खेडकरच्या अडचणीत आणखी वाढ होण्याची शक्यता आहे.

दिल्ली पोलिसांच्या गुन्हे शाखेने जिल्हाधिकारी कार्यालय, स्थानिक पोलीस, पूजा खेडकरच्या दिव्यांग प्रमाणपत्राशी संबंधित शासकीय कार्यालये यांच्याकडे चौकशी केली. पूजा खेडकर प्रकरणाशी संबंधित इतर व्यक्तींकडे देखील तपास करण्यात आला आहे.

पूजा खेडकरच्या पुण्यातील सर्व रहिवासी पत्त्यावर जाऊन सोसायटमधील लोकांकडे देखील चौकशी करण्यात आली आहे. दिल्ली पोलिसांचं गुन्हे शाखा पथक आज अहिल्यानगरमध्येही जाऊनही तपास करणार आहे. युपीएससीच्या तक्रारीवरुन दिल्ली पोलीसांनी पूजा खेडकरच्या विरोधात गुन्हा दाखल केला आहे.

पूजा खेडकरला पाठवण्यात आली होती अंतिम नोटीस

दरम्यान, पूजा खेडकरला अंतिम नोटीस पाठवण्यात आली होती. डीओपीटीने दिलेल्या नोटिशीला पुन्हा एकदा कोणतेही उत्तर दिले नसल्याचे समोर आलं होतं. विभागाने बजावलेल्या नोटिशीनुसार तिला ठराविक मुदत देण्यात आल्यानंतरही नोटिशीला तिने प्रतिसाद दिलेला नव्हता. यापुढे तिला कोणतेही स्पष्टीकरण देता येणार नसल्याचे विभागाकडून स्पष्ट करण्यात आले आहे. नोटीसला उत्तर न दिल्याने खेडकर हिच्या घरावर ही नोटीस लावण्यात आली आहे.