कोकणवासीयांसाठी आनंदाची बातमी! गणेशोत्सवाच्या पार्श्वभूमीवर आणि प्रवाशांची अनेक वर्षांपासूनची मागणी लक्षात घेऊन भारतीय रेल्वेने छत्रपती शिवाजी महाराज टर्मिनस (मुंबई) ते सावंतवाडी दरम्यान नवीन दैनिक एक्स्प्रेस रेल्वे सेवा सुरू करण्यास मंजुरी दिली आहे. या नव्या रेल्वे सेवेच्या माध्यमातून मुंबई आणि कोकणातील प्रवास अधिक जलद, सुरक्षित आणि सोयीस्कर होणार आहे.

नवीन वेळापत्रकानुसार मुंबईहून धावणाऱ्या गाडीचा क्रमांक १५०८७, तर सावंतवाडी रोडहून मुंबईकडे धावणाऱ्या परतीच्या गाडीचा क्रमांक १५०८८ असा असेल. ही एक्स्प्रेस दररोज धावणार असून दादर, ठाणे, पनवेल, पेण, रोहा, माणगाव, वीर, खेड, चिपळूण, सावर्डा, अरावली रोड, संगमेश्वर रोड, रत्नागिरी, अदावली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि सावंतवाडी रोड या महत्त्वाच्या स्थानकांवर थांबा घेणार आहे.

या सेवेचा सर्वाधिक फायदा मुंबईत शिक्षण, नोकरी किंवा व्यवसायासाठी नियमित प्रवास करणाऱ्या कोकणवासीयांना होणार आहे. तसेच रत्नागिरी आणि सिंधुदुर्गमधील पर्यटनस्थळांना भेट देणाऱ्या पर्यटकांसाठीही हा रेल्वे पर्याय अधिक सोयीचा ठरेल.

भारतीय रेल्वेच्या या निर्णयामुळे मुंबई, रायगड, रत्नागिरी आणि सिंधुदुर्ग या जिल्ह्यांतील रेल्वे संपर्क अधिक मजबूत होणार आहे. कोकणातील रेल्वे प्रवास अधिक सुलभ करण्यासाठी हा निर्णय महत्त्वाचा ठरणार आहे.