पुणे : वडिलोपार्जित संपत्तीतून वाटा मिळावा यासाठी भावंडांमध्ये वादाच्या घटना नेहमी घडत असतात. पुण्यातील औंध परिसरात नात्याला काळिमा फासणारी अशीच एक दुर्दैवी घटना समोर आली आहे. वडलांनी कमावलेल्या संपत्तीच्या वादातून सख्या मोठ्या बहिणीला (sister) पेटवून देऊन जीवे मारण्याचा प्रयत्न नराधम भावाने केला आहे. सदर घटनेत जखमी झालेल्या महिलेवर ससून सर्वोपचार रुग्णालयात उपचार सुरू आहेत. प्राप्त माहितीनुसार, औंध परिसरातील अनुसया सोसायटीत शुक्रवारी दुपारी ही घटना घडली असून शरद मनोहर पतंगे (वय 45) असं या अटक करण्यात आलेल्या आरोपीचे नाव आहे.

हे देखील पहा :

राजश्री मनोहर पतंगे ( वय 48) असं या घटनेत जखमी झालेल्या महिलेचे नाव आहे. राजश्री पतंगे व शरद पतंगे हे दोघेही सक्खे भाऊ बहिण आहेत. दोघांना आणखी एक भाऊ असल्याचे समजते आहे. औंधमधील अनुसया हौसिंग सोसायटीमध्ये राजश्री राहत असून त्या अविवाहित आहेत. त्या राहता असलेला फ्लॅट हा त्यांच्या आईच्या नावावर असून गेल्या दोन वर्षांपूर्वी त्यांच्या आई आणि वडिलांचा मृत्यू झाला आहे. फ्लॅट नावावर करण्यावरून आरोपी शरद आणि राजश्री यांच्यामध्ये गेल्या अनके दिवसांपासून खटके उडत आहेत. आरोपी शरद सदर फ्लॅट आपल्या नावावर करून द्यावा अशी मागणी राजश्री यांच्याकडे करत होता.

परंतु, राजश्री यांचा फ्लॅट नावावर करण्याला नकार होता. शुक्रवारी दुपारी शरद हा दारू पिऊन राजश्रीच्या घरी आला व यावेळी देखील राजश्री आणि शरदमध्ये पुन्हा एकदा फ्लॅट नावावर करण्यावरून भांडण सुरू झाले. त्याने फ्लॅट नावावर कर म्हणत पुन्हा राजश्रीसोबाबत वाद घालायला सुरुवात केली. राजश्री यांनी पुन्हा नकार दिला, त्यामुळे आरोपी शरद याने चिडून रागाच्या भरात राजश्री यांच्या साडीला आग लावली आणि त्यांना पेटवून दिले. सुदैवाने लहान भाऊ हा देखील त्यावेळी घटनास्थळी होता. त्याने हि आग विझवण्याचा प्रयत्न केला, यात त्यालाही गंभीर इजा होऊन तो होरपाळून गेला.या घटनेत मात्र, राजश्री यांचा मानेपासून पायापर्यंतचा आणि चेहरा भाग पूर्णतः भाजला आहे. त्यांना तातडीने उपचारार्थ ससून रुग्णालयात दाखल करण्यात आले असून त्यांच्यावर उपचार सुरू आहेत.

Edited By : Krushnarav Sathe