पुण्यातील खांदवे नगर परिसरात एक धक्कादायक घटना उघडकीस आली आहे. घरगुती वादातून पतीने पत्नीचा थेट गळ्यावर चाकूने वार करत हत्या केल्याची खळबळजनक घटना घडली आहे. ही घटना काल दुपारी तीनच्या सुमारास घडली. ममता प्रेम चव्हाण असे मृत महिलेचे नाव असून, याप्रकरणी पोलिसांनी तिच्या पतीला अटक केली आहे.

मिळालेल्या माहितीनुसार, गेल्या काही महिन्यांपासून ममता आणि प्रेम यांच्यात घरगुती वाद सुरू होते. सततचे भांडण आणि तणावामुळे ममता माहेरी जाण्याऐवजी त्यांच्या मावशीच्या घरी खांदवे नगर येथे राहत होती. मात्र, काल दुपारी अचानक प्रेम चव्हाण हे त्या घरी गेले आणि दोघांमध्ये पुन्हा एकदा वाद सुरू झाला.

वादाचा राग इतका वाढला की प्रेमने जवळच असलेल्या चाकूने ममताच्या गळ्यावर सपासप वार केले. या क्रूर हल्ल्यात ममता यांचा जागीच मृत्यू झाला. हल्ल्यानंतर आरोपी प्रेम चव्हाण घटनास्थळावरून फरार झाला होता.

या घटनेची माहिती मिळताच पोलिस घटनास्थळी दाखल झाले. त्यांनी तातडीने पंचनामा करत तपास सुरू केला. काही वेळातच आरोपी प्रेम चव्हाणला ताब्यात घेण्यात पोलिसांना यश आले. मात्र नेमकं हे कृत्य त्याने कोणत्या कारणाने केले? याचा तपास सध्या पोलिसांकडून सुरू आहे. पुण्यात दिवसाढवळ्या घडलेल्या या घटनेमुळे परिसरात एकच खळबळ उडाली आहे.