संजय गडदे

Mumbai News : मुंबईच्या गोरेगाव पोलिसांनी अवघ्या 24 तासाच्या आत दोन तोळ्याची सोन्याची चैन चोरून पळ काढणाऱ्या तीन सोनसाखळी चोरांना अटक केली आहे. हे तिघेही सराईत चोर आहेत. गोरेगाव बस स्टैंडवर बसची वाट पाहत बसलेल्या महिलेच्या गळ्यातून सोनसाखळी चोरून हे चोरटे फरार झाले होते.(Mumbai Police)

याविषयीची तक्रार फिर्यादीने गोरेगाव पोलिसांना दिल्यानंतर गुन्हा दाखल करून गोरेगाव पोलिसांचे एक पथक तात्काळ घटनास्थळी दाखल झाले. त्यानंतर परिसरातील सीसीटीव्ही फुटेजची पाहणी केली तसेच 50 पेक्षा अधिक सीसीटीव्ही फुटेज तपासल्यानंतर आरोपींची ओळख पटली.

त्यानंतर या तीनही सोनसाखळी चोरांना गोरेगाव पोलिसांनी अवघ्या 24 तासांच्या आत अटक करून त्यांच्याकडून चोरीला गेलेली दोन तोळ्याची सोन्याची चैन आणि चोरीसाठी वापरलेली स्कुटी देखील जप्त केली आहे.

जिरेन्द्र नर्सिंग राव कोया (22), ऋषिकेश दळवी उर्फ कल्याबाबू (22) आणि आशिष यादव (21)अशी अटक करण्यात आलेल्या आरोपींची नावे असून त्यांच्यावर मुंबईच्या विविध पोलीस ठाण्यांमध्ये दहापेक्षा अधिक सोनसाखळी चोरी आणि इतर गुन्ह्यांची नोंद आहे.