मुंबई : कॉंग्रेस प्रदेशाध्यक्ष नाना पटोले (Nana Patole) यांनी पुन्हा एकदा भाजपवर टीकास्त्र सोडलं. भारतीय जनता पक्ष विरोधी पक्षांची सरकारे पाडण्यासाठी काळ्या पैशांचा वापर करत असल्याचा आरोप नाना पटोले यांनी केला. बंडखोरी केलेल्या काही आमदारांनी ५० कोटींची ऑफर दिली असल्याची चर्चा होती. हा काळा पैसा भाजपाकडे (BJP) कुठून येतो? याची सीबीआय, ईडीने चौकशी केली पाहिजे, अशी मागणीही नाना पटोले यांनी केली. (Nana Patole Todays News)

'महाविकास आघाडी सरकार पाडण्यासाठी ३५०० कोटी रुपये खर्च केल्याची चर्चा आहे. बंडखोरी केलेल्या काही आमदारांनी ५० कोटींची ऑफर असल्याचे सांगितले होते. हा काळा पैसा भाजपाकडे कुठून येतो याची सीबीआय, ईडीने चौकशी केली पाहिजे'. असं नाना पटोलेंनी म्हटलं आहे.

'राज्यातील जे आमदार गुवाहाटीला गेले होते, त्यांच्याबद्दल लोकामध्ये आजही संभ्रम आहे. मुख्यमंत्री एकनाथ शिंदे २०० आमदार निवडून आणण्याचा दावा करत आहेत. पण फुटीर आमदारांच्या मतदार संघातच जनतेचा त्यांना प्रतिसाद मिळत नसल्याचे चित्र दिसत आहे' असा टोलाही नाना पटोलेंनी लगावला आहे. (Nana Patole vs BJP News)

'अतिवृष्टीमुळे शेतकऱ्यांचे मोठे नुकसान झाले असताना राज्य सरकारकडून केवळ मदतीची घोषणा केली आहे, ही मदत अजून शेतकऱ्यांना मिळालेली नाही. राज्यातील भाजपाप्रणित ईडी सरकार हे हिंदू हिताचा केवळ दिखावा करत आहे. प्रत्यक्षात हे सरकार शेतकरी विरोधी आहे'. अशी टीकाही नाना पटोलेंनी केली.

'हिंदूंचे सरकार आले असून सण, उत्सव आनंदात साजरा करा, असा डांगोरा पिटणाऱ्यांच्या राज्यातच हिंदू शेतकरी मात्र मदतीपासून वंचित आहे. हा मोठा विरोधाभास आहे, असा आरोप महाराष्ट्र प्रदेश काँग्रेस कमिटीचे अध्यक्ष नाना पटोले यांनी केला आहे.

Edited By - Satish Daud