मुंबई : विधानसभा निवडणुकीसाठी आज गुरुवारी शरद पवार गटाने पहिली यादी जाहीर केली. त्यानंतर आता काँग्रेसने विधानसभेसाठी पहिली यादी जाहीर केली आहे. काँग्रेसने विधानसभेसाठी ४८ उमेदवारांची यादी जाहीर केली. काँग्रेसने पहिली यादी जाहीर केल्याने आणखी राजकीय वातावरण तापण्याची शक्यता आहे.

महाराष्ट्रात २८८ विधानसभा मतदारसंघासाठी निवडणूक होणार आहे. महाविकास आघाडीचा जागावाटपाचा तिढा कायम असल्याची माहिती आहे. महाविकास आघाडीचं २७० जागांवर सहमती झाली आहे. त्यानंतर पुढील जागांसाठी मित्रपक्षांशी चर्चा करणार होते. ठाकरे गटाने पहिल्यांदा ६५ उमेदवारांची यादी जाहीर केली. त्यानंतर आज शरद पवार गटाने ४५ उमेदवारांची यादी जाहीर केली. त्यानंतर आता काँग्रेसने ४८ उमेवदावारांची यादी जाहीर केली आहे.

महाविकास आघाडीतील प्रमुख तीन पक्षांनी एकूण १५८ उमेदवार जाहीर केले आहेत. महाविकास आघाडीमध्ये अद्याप काही जागांवर तिढा कायम आहे. या जागांवरील तिढा मिटण्याची शक्यता आहे. त्यानंतर महाविकास आघाडीकडून राज्यातील एकूण २८८ विधानसभा मतदारसंघातील चित्र स्पष्ट होण्याची शक्यता आहे. दुसरीकडे महायुतीने आतापर्यंत १८२ जागांवरील उमेदवार जाहीर केले आहेत. भाजपने ९९, शिंदे गट ४५ आणि अजित पवार गटाने ३८ जागांवरील उमेदवार जाहीर केले आहेत.

नागपूरमधील एक मतदारसंघ शरद पवार गटाच्या वाट्याला

नागपूर शहरातील सहा विधानसभा मतदारसंघांपैकी पाच विधानसभा मतदारसंघ काँग्रेसच्या वाट्याला येण्याची शक्यता होती. पूर्व नागपूर आधीच शरद पवार गटाकडे गेला आहे. काँग्रेसच्या वाट्यातील पाच मतदारसंघांपैकी काँग्रेसने आज चार मतदारसंघांचे उमेदवार जाहीर केले आहेत. मात्र दक्षिण नागपूर मतदारसंघासाठी काँग्रेस आणि ठाकरे गटांमध्ये जोरदार वाद पेटले होते. ती जागा अद्याप जाहीर करण्यात आलेली नाही. त्यामुळे काँग्रेस आणि ठाकरे गटाचा विदर्भातील जागांबद्दलचा वाद अजूनही पूर्णपणे संपुष्टात आलेला नाही हेच या यादीवरून दिसून येत आहे.