रुपाली बडवे, साम टिव्ही

मुंबई : महाराष्ट्रातील राजकारणात आपल्या शैलीने फटकेबाजी करणारे मुख्यमंत्री एकनाथ शिंदे यांनी क्रिकेटचं मैदानही गाजवलं आहे. शिंदे यांनी चक्क क्रिकेटच्या मैदानावर उतरून जोरदार फटकेबाजी केली. चौकार, षटकारांची आतषबाजी करत शिंदे यांनी हम भी कुछ कम नही हे दाखवून दिलं आहे.  (Latest Marathi News)

साक्षात मुख्यमंत्र्यांनाच तुफान फटकेबाजी करताना पाहून त्यांच्यासोबत असलेल्या कार्यकर्त्यांस खेळाडूंचाही चांगलाच उत्साह वाढला. गिरगावातील बाळासाहेबांची शिवसेना शाखा क्रमांक 218 ने आयोजित केलेल्या गिरगाव प्रीमियर लीग क्रिकेट स्पर्धेला मुख्यमंत्री एकनाथ शिंदे (Eknath Shinde) यांनी नुकतीच हजेरी लावली.

यावेळी त्यांना क्रिकेटचा मोह आवरला नाही. कार्यकर्त्यांनी तसेच मैदानातील खेळाडूंनी केलेल्या आग्रहाखातर शिंदे हे मैदानात उतरले. यावेळी त्यांनी जोरदार फटकेबाजी केली. मुख्यमंत्री शिंदेंना क्रिकेट खेळताना पाहून कार्यकर्त्यांचा देखील चांगलाच उत्साह वाढला. (Maharashtra Political News)

काही वेळ क्रिकेटच्या मैदानात फटकेबाजी केल्यानंतर मुख्यमंत्री शिंदे यांनी आगामी सामन्यातील खेळाडूंना स्टेजवर बोलवत टॉसही उडवला. तर आधीच्या सामन्यात उत्कृष्ट खेळ खेळणाऱ्या खेळाडूंचा बक्षीस देऊन सन्मान केला.

यावेळी गिरगावचा शाखा क्रमांक 218 चे शाखाप्रमुख ललित माधव, ठाण्यातील उपविभागप्रमुख अमित लोटलीकर आणि गणेश गोळे, राहुल पवार,राकेश साळवी आणि बाळासाहेबांची शिवसेना पक्षाचे सर्व पदाधिकारी, कार्यकर्ते आणि या स्पर्धेत सहभागी झालेले खेळाडू उपस्थित होते.

Edited By - Satish Daud