मयूर राणे, साम टीव्ही

मध्य रेल्वेच्या प्रवाशांसाठी महत्वाची बातमी हाती आली आहे. मध्य रेल्वेने रविवारी विविध अभियांत्रिकी आणि देखभाल कामे करण्यासाठी मेगाब्लॉकची घोषणा केलीये. यामुळे मध्य रेल्वेच्या माटुंगा-मुलुंडदरम्यान अप आणि डाऊन मार्गावर ही घोषणा करण्यात आलीये.

मध्य रेल्वेच्या माटुंगा – मुलुंड दरम्यान अप आणि डाउन जलद मार्गावर रविवारी ११.०५ ते १५.४५ वाजेपर्यंत मेगाब्लॉक असणार असल्याची माहिती मिळाली आहे. मध्य रेल्वेच्या छत्रपती शिवाजी महाराज टर्मिनसमधून १०.३६ ते १५.१० वाजेदरम्यान सुटणाऱ्या डाउन जलद मार्गावरील गाड्या माटुंगा रेल्वे स्टेशनवरून डाउन धीम्या मार्गावर वळवण्यात येणार आहेत. त्यामुळे या ट्रेन माटुंगा ते मुलुंड दरम्यान त्यांच्या नियोजित थांब्यांवर थांबणार आहेत. या ट्रेन वेळापत्रकानुसार स्थानकावर सुमारे १५ मिनिटे उशिराने पोहोचतील. ठाण्यापुढील जलद गाड्या मुलुंड स्थानकावरून पुन्हा डाउन जलद मार्गावर वळवण्यात येणार असल्याची माहिती मिळत आहे.

ठाण्यातून ११.०३ ते १५.३८ वाजेदरम्यान सुटणाऱ्या अप जलद मार्गावरील गाड्या मुलुंड स्टेशनवरून अप धीम्या मार्गावर वळवण्यात येणार आहे. या गाड्या मुलुंड ते माटुंगादरम्यान त्यांच्या नियोजित स्टेशनवर थांबणार आहेत. त्यानंतर माटुंगा स्टेशनवर या ट्रेन पुन्हा अप जलद मार्गावर वळवण्यात येणार आहेत. त्या ट्रेन वेळपत्रकानुसार स्टेशनवर सुमारे १५ मिनिटे उशिराने पोहोचतील.

हार्बर मार्गावर काय परिणाम होणार?

मुंबईतील छत्रपती शिवाजी महाराज टर्मिनस – चुनाभट्टी / बांद्रा दरम्यान डाउन हार्बर मार्गावर ११.४० ते १६.४० वाजेपर्यंत मेगाब्लॉक असणार आहे. तर चुनाभट्टी / बांद्रा – छत्रपती शिवाजी महाराज टर्मिनसदरम्यान अप हार्बर मार्गावर ११.१० ते १६.१० वाजेपर्यंत मेगाब्लॉक असणार आहे. छत्रपती शिवाजी महाराज टर्मिनस येथून ११.१६ ते १६.४७ वाजेदरम्यान वाशी / बेलापूर / पनवेलकडे जाणाऱ्या डाउन हार्बर मार्गावरील सेवा या १०.४८ ते १६.४३ वाजेदरम्यान बांद्रा / गोरेगावकडे जाणाऱ्या डाउन हार्बर मार्गावरील सेवा रद्द राहतील.

पनवेल / बेलापूर / वाशी स्थानक येथून ९.५३ ते १५.२० वाजेदरम्यान छत्रपती शिवाजी महाराज टर्मिनसकडे जाणाऱ्या अप हार्बर मार्गावरील सेवा आणि गोरेगाव / बांद्रा स्टेशनमधून सकाळी १०.४५ ते सायंकाळी १७.१३ वाजेदरम्यान छत्रपती शिवाजी महाराज टर्मिनसकडे जाणाऱ्या अप हार्बर मार्गावरील सेवा रद्द असणार आहेत. ब्लॉक कालावधीत पनवेल आणि कुर्ला दरम्यान विशेष सेवा २० मिनिटांच्या अंतराने चालवण्यात येणार आहेत. ब्लॉक कालावधीत हार्बर मार्गावरील प्रवाशांना १०.०० ते सांयकाळी ०६.०० वाजेपर्यंत मुख्य मार्ग आणि पश्चिम रेल्वे मार्गावरून प्रवास करण्याची परवानगी देण्यात आली आहे.