झोपडपट्ट्यांच्या स्वच्छतेसाठी महापालिकेकडून विविध उपक्रम राबवले जात आहेत. याच उपक्रमांतर्गत आता झोपडपट्ट्यांमधील रस्ते, नाले, शौचालयांच्या स्वच्छतेबरोबर घरोघरी जाऊन कचरा संकलन केले जाणार आहे. यासाठीची निविदा प्रक्रिया पालिकेने राबवली असून चार वर्षांसाठी १४ कोटींचा खर्च केला जाणार आहे.

मुंबईत दाटीवाटीने उभ्या अनेक झोपडपट्ट्या आहेत. यात धारावीसारख्या झोपडपट्टीचाही समावेश आहे. अशा झोपडपट्ट्यांतील घनता आणि बाजारहाट पाहता येथे दिवसभर कचरा निर्माण होतो. बऱ्याचदा स्थानिक लोक आणि दुकानदार निर्माण होणारा कचरा कचराकुंड्यांमध्ये फेकतात; तर काही व्यावसायिक रात्री उशिरा कचरा फेकत असल्यामुळे कचराकुंड्या नेहमीच ओसंडून वाहतात. त्यामुळे झोपडपट्टी भागांमध्ये सतत साचलेला कचरा दिसतो. त्यामुळे विविध प्रकारची साफसफाई आणि स्वच्छता मोहीम महापालिका राबवणार आहे. त्याचाच एक भाग म्हणून सफाई कर्मचारी घरोघरी जाऊन कचरा गोळा करणार आहेत. इतकेच नाही, तर घराबाहेरील पॅसेज, नाले आणि शौचालयेही स्वच्छ केली जाणार आहेत. यासाठी पालिकेने निविदा प्रक्रिया सुरू केली असून चार वर्षांसाठी १३,९८,२१,३६६ कोटींचा खर्च केला जाणार आहे.

नवीन ठेकेदारांची नियुक्ती

मुख्यमंत्री एकनाथ शिंदे यांनी झोपडपट्ट्यांच्या ‘डीप क्लिनिंग’चे निर्देश दिले आहेत. त्यानुसार पालिकेने स्वच्छता मोहीम हाती घेतली असून स्वच्छतेसाठी ठेकेदारालाही बदलण्यात आले असून नवीन ठेकेदार नियुक्त केले जात आहेत.