अजित पवारांच्या विमान अपघातावरून नवनवीन आरोप केले जात आहेत. रोहित पवारांनी अजितदादांचा घात झाल्याची शक्यता व्यक्त केली आहे. रोहित पवारांच्या दाव्याला राष्ट्रवादीचे आमदार अमोल मिटकरी यांनीही दुजोरा दिला आहे. या आरोपादरम्यान विमान अपघाताची शॉकिंग अपडेट समोर आली आहे. बारामतीमधील विमान अपघातामधील ब्लॅकबॉक्स जळाला आहे. त्यामुळे डेटा रिकव्हर करायला अडचण येत आहे. त्यामुळे ब्लॅकबॉक्समधील पुरावा नष्ट झाला का, अशी भीती व्यक्त करण्यात येत आहे.

अजित पवार विमान अपघात प्रकरणातही राष्ट्रवादीचे आमदार अमोल मिटकरी यांनी 'एक्स'वर पोस्ट करत काही प्रश्न उपस्थित केले आहेत. ब्लॅकबॉक्स जळालेला असल्याने डेटा रिकव्हर करायला अडचण येत असल्याचे आमदार अमोल मिटकरी यांनी सांगितले. अमोल मिटकरी म्हणाले, आता ब्लॅकबॉक्स परदेशात रिकव्हर होणार आहे. त्यामुळे लवकरच विमान अपघाताची माहिती मिळणार असे समजतो'.

'आम्ही तोवर वाट पाहू. पण त्याआधी विमानतळावरील सीसीटीव्ही फुटेज,पायलट साहिल मदन, पायलट यश, पायलट सुमित कपूर आणि शांभवी पाठक हे घरातून किती वाजता आणि कुण्याच्या गाडीत निघाले. कोणत्या रोडवर ट्रॅफिकमध्ये अडकले. त्या ठिकाणाचे सीसीटीव्ही फुटेज आणि सर्व या पायलटचा २८ जानेवारी २०२६ चा दिनक्रम महाराष्ट्राला कळू द्यावा, अशी विनंती अमोल मिटकरी यांनी केली.

अजितदादांचं विमान उडण्यासाठी सुरक्षित होतं का?

अजित पवार विमान अपघात तपास प्रकरणी महत्वाची अपडेट हाती आली आहे. विमानाच्या एअरवर्थिनेस म्हणजेच हवाई प्रवासक्षमता आणि विमानाची उड्डाण योग्यतेबाबत तपास होणार आहे. DGCA कडून विमानाच्या एअरवर्थिनेस आणि ऑपरेशनल कंडीशनबाबत समांतर चौकशी सुरू होणार आहे. तपासाअंती ते विमान उडण्यासाठी सुरक्षित होतं का, याबाबत स्पष्टता येणार आहे. या तपासणीला पुढील १० ते १५ दिवस लागण्याची शक्यता आहे. तपास यंत्रणेकडून खासगी विमान कंपनीच्या विविध कागदपत्रांची पडताळणी होणार आहे.