मुंबई: शिवसेना खासदार संजय राऊत यांनी ट्विट केलेल्या एका व्यंगचित्रामुळे संजय राऊतांची चांगलीच गोची झाली आहे. शिवसेना आणि भाजपच्या युतीबाबत संजय राऊतांनी एक व्यंगचित्र (Cartoon) शेयर केलं होतं. त्यात शिवसेनेचे संस्थापक स्वर्गीय बाळासाहेब ठाकरे (Balasaheb Thackeray) आणि भाजपचे नेते स्वर्गीय प्रमोद महाजन (Pramod Mahajan) यांना दाखवण्यात आले आहे. परंतू यात बाळासाहेब ठाकरे हे एका खुर्चीवर बसलेले तर दुसऱ्या खुर्चीवर पाय ठेवलेले दिसतायत तर प्रमोद महाजन उभे असून बाळासाहेब प्रमोद महाजन यांना बसण्यास सांगत आहेत आणि शेजारीच एक छोटा पाट किंवा स्टूल ठेवण्यात आल्याचं या व्यंगचित्रात दिसतंय. (bjp mp poonam mahajan slams shiv sena mp sanjay raut for controversial cartoon)

यावरुन भाजप हा तेव्हा स्वतः शिवसेनेकडे सीटच्या (महायुतीच्या) बोलणीसाठी आले होते असे दाखवण्यात आले आहे. हे कार्टून ट्विट करत संजय राऊतांनी (Sanjay Raut) "कोण कोणामुळे वाढले? उघडा डोळे…बघा नीट…" असं कॅप्शन दिलं. त्यामुळे प्रमोद महाजन यांच्या कन्या तथा भाजप खासदार पूनम महाजन (Poonam Mahajan) यांनी संजय राऊतांना चांगलंच झापलं.

खासदार पूमन महाजन यांनी संजय राऊतांच्या ट्विटला प्रत्युत्तर देत लिहिलं की, "स्वर्गीय बाळासाहेब व स्वर्गीय प्रमोदजी, या दोन मर्दांनी हिंदुत्वासाठी युती केली होती. नामर्दांसारखे कार्टून दाखवू नका." अशा कडक शब्दांत त्यांनी राऊतांना दणका दिला. यानंतर संजय राऊतांनी ते ट्विट लगेचचं डिलीट केलंं. पण तोपर्यंत उशीर झाला होता. अनेकांनी राऊतांच्या ट्विट्सचे स्क्रीनशॉट्स शेयर करत त्यांच्यावर टीकेची झोड उठवली. आता यामुळे भाजप आणि शिवसेनेत पुन्हा वाद निर्माण होण्याची शक्यता आहे.

Edited By - Akshay Baisane